navarra.es
Castellano | Euskara | Français | English
Ezagutzera eman
146/2007 Foru Agindua, maiatzaren 14koa, Nekazaritza, Abeltzaintza eta Elikadura kontseilariak emana, nekazaritzako elikagaien sektoreko produktuak eraldatu eta merkaturatzeko Nafarroako Foru Komunitateko estatu-laguntzei buruzko araudia ezartzen ...
146/2007 FORU AGINDUA, maiatzaren 14koa, Nekazaritza, Abeltzaintza eta Elikadura kontseilariak emana, nekazaritzako elikagaien sektoreko produktuak eraldatu eta merkaturatzeko Nafarroako Foru Komunitateko estatu-laguntzei buruzko araudia ezartzen duena, lurralde-xedea duten estatu-laguntzen 2007-2013 bitarteko mapan sarturik dauden Nafarroako eskualdeetarako
(Testu bateratua. Jatorrizkoa 2007ko 68. NAOn argitaratua, ekainaren 1ean. Aldaketak: 183/2008 Foru Agindua, apirilaren 24koa)
Atarikoa
Batzordeak 2006ko urriaren 24an emandako 1628/2006/EE Erregelamenduak, inbertsiorako eskualde-laguntzen gaineko Itunaren 87. eta 88. artikuluen aplikazioari buruzkoak, baldintza batzuk ezartzen dizkie inbertsiorako laguntzei, merkatu bateratuarekin bateragarriak izateaz gain, Itunaren 87. artikuluko 3. idatz-zatian xedatutakoaren arabera, Itunaren 88. artikuluko 3. idatz-zatian agintzen den jakinarazpena egin beharretik salbuetsita egon daitezen.
Batzordeak hala erabakita, 2006ko abenduaren 20an, Espainiako eskualde-laguntzen 2007-2013 bitarteko mapa (2007/B 35/03) EE Itunarekin bateragarritzat jo da, eskualde-xedeko 2007-2013 bitarteko estatu-laguntzei buruzko gidalerroetan ezarritako baldintzak betetzen dituelako. Mapa horrek 2007ko urtarrilaren 1etik 2013ko abenduaren 31ra arte du indarra.
Foru agindu honetan aurreikusitako laguntzak aipatu 1628/2006 Erregelamenduaren esparruan daude.
Neurri hau azaroaren 20ko 361/2000 Foru Dekretuaren babesean aurreikusitako neurriaren ondorengoa da. Foru dekretu horrek inbertsioa eta enplegua sustatzeko laguntzetarako araubide berria ezarri zuen, Itunaren I. eranskinean ageri ez diren nekazaritzako produktuak eraldatu eta merkaturatzeko nekazaritzako elikagaien industriei zegokiena, eta 2006ko abenduaren 31ra arte egon zen indarrean.
Esparru berrian, oraingo neurriaren helburu orokorra da lehiakortasuna hobetzea Itunaren I. eranskinean ageri ez diren nekazaritzako elikagaiak eraldatu eta merkaturatzeko sektorean; bai eta I. eranskinean ageri diren nekazaritzako produktuak eraldatu eta merkaturatzeko sektorean ere, horretan diharduten enpresak handiak badira, gutxienez 750 langile eta 200 milioi euroko negozio bolumena dituztenak. Xede horrekin, balio erantsi handiagoa duten kalitatezko produktuak sustatuko dira, eraldatze eta merkaturatze prozesuen eraginkortasuna hobetuko da eta teknologia, prozesu eta sistema berriak eta produktu berritzaileak sartuko dira. Hori guztia, eraldatzea eta merkaturatzea sustatzea, laneko segurtasuna hobetzea, ingurumena babestea eta abereen higienea eta ongizatea hobetzea xede dituen estrategiaren ildotik.
Neurri honek Nafarroako Nekazaritzarako Plan Estrategikoaren orientazioak jasotzen ditu, batez ere 2.1 helburu estrategikoaren ("Produkzioaren baldintzak hobetzea Nafarroako produktuek merkatuetan leku hobea izan dezaten") eta 2.2 helburu estrategikoaren ("Nafarroako produktuetarako aukerak eta negozio-baldintzak sortzea") ingurukoak.
Azaroaren 9ko 11/2005 Foru Legeak, dirulaguntzei buruzkoak, 17.1 artikuluan ezartzen du dirulaguntzak emateko prozedura arrunta norgehiagokaren prozedurari jarraituz tramitatuko dela, salbu eta Nafarroako Gobernuak, behar adinako arrazoiak tarteko, banakako ebaluazioa egiteko baimena ematen duenean. Kasu honetan, ezinbestekoa da laguntza hauek banakako ebaluazioaren prozeduraren bitartez ematea, Nafarroako nekazaritzako elikagaien sektorearen indarra bermatzeko. Hala, dirulaguntza eman ahalko zaie oinarri arautzaileetan ezarritako baldintzak betetzen dituzten inbertsio-ekimen guztiei.
Hori horrela, Nafarroako Gobernuak, 2007ko apirilaren 2ko Erabakiaren bidez, Nekazaritza, Abeltzaintza eta Elikadura Departamentuari baimena eman dio, Dirulaguntzei buruzko azaroaren 9ko 11/2005 Foru Legearen 17.1 artikuluan ezarritakoarekin bat, banakako ebaluazioaren araubidea erabil dezan laguntza hauek emateko: nekazaritzako elikagaien sektoreko produktuak eraldatu eta merkaturatzeko inbertsioetarako Nafarroako Foru Komunitateko estatu-laguntzak.
Xedapen hau prestatzean entzun egin zaie nekazaritzako industriaren sektorea ordezkatzen duten erakundeei.
Horrenbestez, Nafarroako Gobernuari eta haren lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz, agindu dut:
I. KAPITULUA. Xedea eta definizioak
1. artikulua. Xedea eta aplikazio eremua.
1. Foru agindu honen xedea da nekazaritzako elikagaiak eraldatu eta merkaturatzen dituen sektorean inbertitzeko laguntzak ezartzea, Batzordeak 2006ko urriaren 24an emandako 1628/2006/EE Erregelamenduaren babesean (Itunaren 87. eta 88. artikuluak inbertsiorako eskualde-laguntzei aplikatzeko Erregelamendua).
2. Produktuei dagokienez, I. eranskinean ageri ez diren produktuak sartuko dira aplikazio esparruan, bai eta I. eranskineko produktuak ere, enpresak handiak direnean. Lurralde eremua, berriz, Espainiarako eskualde-laguntzen 2007-2013 bitarteko mapan sarturik dauden eskualdeena izanen da. Batzordeak 2006ko abenduaren 20an onetsi zuen mapa hori (2007/B 35/03), eta Nafarroari dagokion zatia foru agindu honen eranskinean dago.
2. artikulua. Definizioak.
Foru agindu honen ondorioetarako, Europar Batasuneko araudian eta Nekazaritzako Ustiategien Erregistroari buruzko Foru Legearen Testu Bateginean, uztailaren 2ko 150/2002 Legegintzako Foru Dekretuak onetsian, bildutako definizioez gain, honako hauek aplikatuko dira:
1. Mendialdeko eskualdeak eta eskualde behartsuak, 1698/2005/EE Erregelamenduaren 36. artikuluko a) letrako i) eta ii) tartekietan aurreikusi eta 50. artikuluko 2., 3. eta 4. idatz-zatietan definitutako eskualdeak. Nafarroako mendialdeko eskualdeak eta eskualde behartsuak, 2009ko abenduaren 31ra arte, Nekazaritza, Abeltzaintza eta Elikadura kontseilariak 2002ko maiatzaren 15ean emandako Foru Aginduan adierazitakoak dira.
2. Enpresa txiki eta ertainak (ETT) definitzeko, mikroenpresen, enpresa txikien eta enpresa ertainen definizioari buruzko 2003ko maiatzaren 6ko 2003/361/EE Gomendioan ezarritakoari jarraituko zaio.
II. KAPITULUA. Inbertsioak nekazaritzako produktuak eraldatu eta merkaturatzeko sektorean
3. artikulua. Onuradunek bete beharreko baldintzak.
Foru agindu honetako laguntzen onuradun izanen dira diruz lagundu daitezkeen inbertsio eta gastuen azken erantzuleak diren eta finantza-karga jasotzen duten pertsona fisiko edo juridikoak, bideragarritasun ekonomikoa froga dezaketen enpresetan.
4. artikulua. Inbertsioen baldintzak.
1. Honelako inbertsioak egiteko emanen dira laguntzak:
a) Nafarroan egindako inbertsioak, 1. artikuluan aipatutako Espainiarako eskualde-laguntzen maparen arabera dirulaguntza jaso dezaketen eskualdeetan.
b) Enpresaren errendimendu globala hobetzen dutenak.
c) Kasuan kasuko inbertsioari dagozkion Europar Batasuneko arauak betetzen dituztenak.
d) Honako eremuetan eragina dutenak:
-Itunaren I. eranskinean ageri ez diren nekazaritzako produktuak eraldatu eta/edo merkaturatzea.
-I. eranskinean ageri diren nekazaritzako produktuak eraldatu eta merkaturatzea, enpresa handia bada (gutxienez 750 langile eta 200 milioitik gorako negozio bolumena).
2. Inbertsioen bideragarritasuna eta errentagarritasuna frogatu beharko dira azterlan ekonomiko egokiaren bidez.
5. artikulua. Onuradunen konpromisoak.
Laguntzen onuradunek konpromiso hauek bete beharko dituzte:
a) Inbertsio plana betetzea, laguntza emateko administrazio ebazpenean ezartzen zaien epea igaro baino lehen, eperik ezarriz gero.
b) Dirulaguntzaren xede izan diren ondasunak enpresan atxikitzea, erabiltzeko moduan, inbertsioak amaitzen direnetik bost urte igaro arte, gutxienez, edo beren bizitza baliagarri osoan, gutxiago irauten badute. Bitarte horretan ondasun horiek ezin izanen dira eskualdatu, errentan eman edo hirugarrenei laga.
c) Jasotako funtsak dirulaguntza ematerakoan ezarri zen xederako erabiltzea.
d) Nekazaritza, Abeltzaintza eta Elikadura Departamentuaren kontrolak onartzea eta hark eskatzen dituen agiri, datu eta bestelako informazioak ematea, espedientea tramitatu dadin eta aurkeztu den proiektua egiaz gauzatu dela eta hartutako konpromisoak betetzen direla egiaztatu dadin.
e) Helburu bereko beste dirulaguntza publikoren bat eskatzen bada, Nekazaritza, Abeltzaintza eta Elikadura Departamentuari jakinaraztea.
f) Bere kontabilitatean edo erregistro liburuetan, jasotako dirulaguntza erregistratzea.
g) Onuraduna kooperatiba bada, Nafarroako kooperatibei buruzko abenduaren 11ko 14/2006 Foru Legearen 45. artikuluko 12. idatz-zatian xedatutakoa betetzea, kapital dirulaguntzak ondareari edo ustiapen kontuari eranstea dela-eta.
h) Gutxienez %25eko finantza-ekarpena egitea, bere baliabideak erabiliz edo inongo laguntza publikorik gabeko kanpo-finantzaketaren bidez.
i) Enpresaren alderdi tekniko-ekonomikoei, lan arlokoei eta gizarte arlokoei buruz behar den informazioa ematea, baita neurri honen esparruan jasotako laguntzen gaineko informazioa ere, horien jarraipen eta ebaluaziorako adierazleak prestatu ahal izan daitezen.
6. artikulua. Dirulaguntzen xede izan daitezkeen inbertsioak.
Inbertsio hauek dirulaguntzen xede izan daitezke:
a) Higiezinak eraiki, eskuratu edo hobetzea.
b) Makinaria eta ekipamendu berriak erostea edo alokatu-erostea, ordenagailuen euskarri logikoak barne, produktuaren merkatu-balioraino.
c) ETE-en kasuan, inbertsioa prestatzeko azterlanen kostuak eta inbertsioarekin zerikusia duten aholkularitza kostuak.
7. artikulua. Laguntzen orotariko mugak.
1. Inbertsio hauek ezin dira dirulaguntzen xede izan:
a) Ordezte hutserako inbertsioak eta ekipamendu edo makina erabiliak erostekoak.
b) Onetsitako azken balantzean ageri den balorazioaren arabera, produkzio lantegiko edo establezimenduko ibilgetu osoaren %1 baino gutxiago ukitzen duten zaharberrikuntzak eta handitzeak.
c) Produkzioa handitzen duten inbertsioak, baldin eta Nekazaritza Bermatzeko Europako Funtsak (NBEF) finantzaturiko merkatu antolakunde bateratu batek, laguntza erregimenak barne, ezarritako banakako produkzio-murrizketak edo mugak gainditzen badira.
d) Fruta eta barazki fresko eta eraldatuen sektorea xede duten 1.200.000 eurotik beherako inbertsioak, laguntza eskatu bada sektore horietako merkatu antolakunde bateratuaren esparruan.
e) Tabakoaren sektorea, olioaren eta mahaiko olibaren sektorea eta eztiaren sektorea xede dituzten inbertsioak, ekoizle elkarteek sustatuak, horiek kasuan kasuko merkatu antolakunde bateratuaren esparruan ematen den laguntza jasotzeko aukera badute.
f) Esnearen edo esnekien suzedaneo edo ordezkoak fabrikatu eta merkaturatzeko inbertsioak.
g) Laguntzak eskatu aurretik hasitako inbertsioak, salbu proiektuaren lansariei eta bideragarritasun azterlanei dagozkienak, hala nola eraikitzeko baimenekin zerikusia dutenak.
h) Txikizkako sektorean egindakoak.
i) Garraio osagaiak, non eta ez dauden ezin bereizizko moduan loturik eraldatze prozesuekin.
j) Arrantza eta akuikulturako produktuak eraldatu edo merkaturatzeko inbertsioak.
k) Ikerketa proiektuak egiteko edo nekazaritzako produktuak sustatzeko neurriak.
l) Basogintza sektorerako inbertsioak.
2. Ez dira dirulaguntzaren xede izanen BEZa edo onuradunak berreskuratzen ahal dituen beste zerga batzuk ordaintzeko gastuak eta zorren korrituak.
3. Finantza errentamenduko eragiketen bidez eskuratutako makineriak eta ekipamenduak jaso dezakete dirulaguntza, baldin eta eragiketa horietan onuraduna makineria edo ekipamendu horren jabe bihurtzeko erosketa konpromisoa baldin badago. Kontratuaren gehienezko zenbatekoak ez du aktibo errentatuaren merkatuko balio garbia gainditu behar. Finantza errentamenduko kontratuari lotutako beste kostu batzuetarako, hala nola zerga, errentatzailearen marjina, korrituak birfinantzatzeko kostu, gastu orokor edo aseguru gastuetarako, ez daiteke laguntzarik jaso.
Salmenta eta errentamendu erretroaktiboko sistema baten esparruan eskuratzen diren ondasunetarako ez daiteke dirulaguntzarik jaso.
4. Laguntzak jaso ahal izateko, inbertsioen zenbatekoak 36.000 eurotik gorakoa izan behar du. Nekazaritzako elikagaien artisautza arautzen duen maiatzaren 23ko 103/1999 Foru Dekretuan artisautzakotzat katalogatuta dauden enpresen eta horiek osatutako elkarteen kasuan, inbertsioen zenbatekoak 12.000 eurotik gorakoa izan behar du.
8. artikulua. Laguntzen mota eta zenbatekoa.
1. Zuzeneko dirulaguntzak emanen dira.
2. Onuraduna pertsona juridikoa izanez gero, dirulaguntzak ez dira izanen eskrituratu eta ordaindutako kapitala baino gehiago. Muga hori ez zaie aplikatuko Nafarroako kooperatibei buruzko abenduaren 11ko 14/2006 Foru Legeak arautzen dituen nekazaritzako kooperatibei.
3. Laguntzen zenbatekoa baremo honen bidez zehaztuko da:
***************tabla***************
(a) Lehen ezarpena. Enpresa batek Nafarroan nekazaritzako elikagaien sektoreko lantegi bat lehenbiziko aldiz ezartzea, edo, lehendik lantegiren bat izanda, beste bat instalatzea Nafarroako beste toki batean, bestelako produktuak ekoizteko, hau da, beren gama edo lantze-mailagatik, sektoreagatik edo produkzio-teknologiagatik aurrekoetatik bereizten ahal diren produktuak ekoizteko.
(b) Kalitatezko produkzioa. Ekoizpen ekologikoko produktuak, jatorri-deitura edo adierazpen geografiko babestua duten produktuak eta artisautzako produktuak xede dituzten inbertsioak.
(c) Nazioartera ateratzea:. Azken ekitaldiko fakturazio osoaren %10 baino gehiago esportazioetan egin duten enpresak. Enpresa sortu berria bada, edo nazioartera ateratzeko fasearen hasieran ari bada, aurrekoaren baliokidetzat joko da enpresak nazioartera ateratzeko proiektuetan parte hartzea organo eskudunekin lankidetzan (Administrazio Publikoa, merkataritza ganbera ofizialak, ICEX etab.).
(d) Berrikuntza. Azken hiru urteetan Europar Batasuneko, Estatuko edo Nafarroako Foru Komunitateko deialdietako I+G+B proiektuetan parte hartu izana frogatzen duten enpresak, eta Estatuan edo Nafarroako Foru Komunitatean ofizialki onartuta dauden teknologia zentroei atxikitakoak.
(e) Lanpostuak sortu edo finkatzea. Positiboki baloratuko da enplegu finkoa sortu eta finkatzea, betiere horrek plantilla osoaren murrizketarik ez badakar, gutxienez bost langile, eta emakumezko langileentzat enplegua sortu eta finkatzea %25eko portzentajean edo handiagoan, gutxienez hiru lanpostu.
(f) Artisautzako edo produkzio ekologikoko enpresak: Nekazaritzako elikagaien artisautzako produkzioa edo produkzio ekologikoa jarduera bakarra duten enpresak, dagozkien erregistroetan inskribatuak, plantilla osatzen duten familiaz kanpoko langile finkoen kopuruaren arabera.
4. Baremoaren bidez ateratako kopuruei muga hauek aplikatuko zaizkie:
******************tabla******************
6. Betiere laguntzen muga %10 izanen da enpresa handientzat, %20 enpresa ertainentzat eta %30 enpresa txikientzat.
9. artikulua. Dirulaguntza emateko modua.
Aurreikusitako laguntzak banakako ebaluazioaren prozeduraren bidez emanen dira. Baldintzak betetzen direla frogatzeko modua.
1. Laguntzarako eskabideari agiri hauek erantsi behar zaizkio:
a) Eskatzailearen posta elektronikoko helbidea edo telefaxa, jakinarazpenak bidaltzeko.
b) Nortasuna egiaztatzeko agiria. Pertsona fisikoentzat, NANaren fotokopia. Pertsona juridikoentzat, IFZren kopia, eraketa eskriturak, estatutuak, gobernu organo eskudunak laguntza hauek eskatzeko hartutako erabakiaren agiria, eta eskabidea tramitatzen duen ordezkariaren izendapena. Sozietatearen kapitalaren banaketa frogatzen duten agiri osagarriak, horrelakorik baldin bada.
c) Enpresaren gaineko informazioa. Enpresaren deskribapena, negozio bolumena, beste enpresa batzuekin duen mendekotasun maila, eta plantilla, kategorien arabera zehaztua, hala nola kontratu motak.
d) Baimenak:
-Kontsultak egiteko Nekazaritza, Abeltzaintza eta Elikadura Departamentuko datu basean eta Lurralde Antolamendu eta Etxebizitza Departamentukoan, beharrezkoak baitira laguntzen tramitaziorako.
-Gizarte Segurantzarekiko betebeharrak eta zerga arlokoak eguneratuak daudela egiaztatzeko.
e) Erantzukizunpeko adierazpena: xede bereko beste laguntzaren bat eskatu edo jaso den adierazi behar da, bai ala ez.
f) Enpresa plana, haren bideragarritasuna frogatuko duena, haren finantza egoeraren eta etorkizunaren ebaluaziotik abiaturik.
g) Inbertsio proiektuari eta lortu nahi diren helburuei buruzko memoria, gutxienez ondoko atal hauek bilduko dituena:
-Ondasun higiezinetan, makinetan eta ekipamenduan egitekoa den inbertsioa, proiektu eta aholkularitza gastuak, bideragarritasun azterlanen gastuak eta patente eta lizentziak eskuratzekoak, aurrekontu zehaztuak barne. Obrak egiteko gastuak 30.000 eurotik gorakoak badira edo ekipamendu ondasunen horniduragatik edo aholkularitza eta laguntza arloetako enpresen zerbitzuengatik 12.000 eurotik gorako gastua egiten bada, proformako fakturak edo hornitzaileen eskaintzak erantsi behar dira, salbu eta, diruz lagundu daitezkeen gastuen ezaugarri bereziengatik, merkatuan zerbitzu horiek egiten dituen entitaterik ez badago.
-Erantzukizunpeko adierazpena eta txostena, ondokoa justifikatzeko: hornitzaileak hautatzerakoan ekonomiaren eta eraginkortasunaren irizpideei jarraitu zaiela, Dirulaguntzei buruzko 11/2005 Foru Legean ezarritakoarekin bat.
-Produktu bakoitzaren fabrikazio prozesuaren eta fabrikatzeko ahalmenaren azalpena, proiektua burutu aurretik eta ondotik.
-Erabili beharreko lehengaiak, urteko kopurua, nondik heldu diren eta haien fabrikako balioa, inbertsioak gauzatu aurretik eta ondotik.
-Lehengaiak eta bukaturiko produktuak biltzeko ahalmena, egindako inbertsioen arabera.
-Inbertsioaren bideragarritasunaren azterketa.
-Inbertsioak gauzatzearen ondoriozko plantilla aldaketa.
-Inbertsioaren finantza plana, bertako baliabideei eta besteren finantzaketari dagozkien kopuruak zehaztuta.
-Egoeraren balantzea eta ustiapen kontuak, itxitako azken hiru ekitaldiei dagozkienak. Merkataritza Erregistroan erregistraturiko urteko kontuen kopia aurkeztu behar da, edo sozietateen gaineko zergaren kopia, edo kontu-auditoriaren gaineko txostena.
-Urteko kontu bateratuak, enpresa talderen batekoa baldin bada.
-Urteko aurreikuspen kontuak, proiektua abian jarri ondoko hiru urteetarako.
-Inbertsioa eginen den lurren identifikazioa eta kokapena.
h) Obretarako udal baimena, edo eskatua dagoela frogatzea.
i) Ingurumen baimen integratua edo jarduera sailkaturako udal lizentzia, Ingurumena babesteko esku hartzeari buruzko martxoaren 22ko 4/2005 Foru Legearen eraginpeko jarduera bada. Oraindik ez badira jaso, eskatu izanaren agiriak aurkeztuko dira.
j) Albaitari batek emandako ziurtagiria edo txostena, jarduerak zerikusirik baldin badu abeltzaintzako produktuak eraldatu edo merkaturatzearekin. Agiri horren bidez frogatu behar da ustiategiak Europako Erkidegoaren arauak betetzen dituela, abeltzaintzako ustiategietako abereen babesari dagokionez.
k) Dirulaguntzaren xede diren ondasunak gutxienez bost urtean, edo, gutxiago irauten badute, haien balio-bizitza osoan, hirugarrenek erabiltzeko eskualdatu, alokatu edo lagako ez direla dioen konpromisoa.
l) Eskatzaileak laguntzak lehenbizikoz hartu behar dituenean edo laguntzak kobratzeko kontua aldatu nahi duenean, laguntzarako eskabidearekin batera transferentzia bidez kobratzeko eskabidea aurkeztu beharko du, behar bezala beterik.
2. Gainera, berariazko agiri hauek aurkeztuko dira:
a) Eraikita dauden eraikinak eta inguruko lurrak erosten badira:
-Tasatzaile independente eta kualifikatu batek emandako ziurtagiria, prezioa merkatu-baliotik gorakoa ez dela egiaztatzeko. Tasazioan lokalaren prezioa eta lurrarena bereiziko dira.
-Azken hamar urteetan eraikinari eman zaizkion diru-laguntzen aitorpena.
b) Finantza-errentamendua: kontratua eta, behar izanez gero, 7. artikuluko 3. puntuan ezarritako baldintzak betetzen direla egiaztatzeko agiriak.
3. Foru agindu honetan araututako laguntzen eskabidea aurkezteak bertan ezarritako konpromisoen onarpena dakar berekin.
III. KAPITULUA. Xedapen administratibo erkideak
11. artikulua. Eskabideak aurkeztu, tramitatu eta ebaztea.
1. Foru agindu honetan arautzen diren laguntzetarako eskabideak ondoko toki hauetan aurkeztu ahalko dituzte interesatuek: Nekazaritza, Abeltzaintza eta Elikadura Departamentuaren erregistroan, Nafarroako Gobernuaren gainerako erregistroetan, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legeak, urtarrilaren 13ko 4/1999 Legeak aldatu zuen horrek, 38.4 artikuluan baimendutako gainerako tokietan.
2. Eskabideak, betiere, inbertsio proiektua gauzatzen hasi aurretik aurkeztu behar dira, eta laguntzen instrukzioa egiten duen organoak, egin beharreko ebaluazio zehatzaren azken emaitza ezertan eragotzi gabe, berretsi eginen du, idatziz, telefax bidez edo posta elektronikoaren bidez, eskabideak foru agindu honetan ezarritako baldintzak betetzen dituela dirulaguntza jasotzeko. Bi baldintza horiek bete aurretik inbertsioa hasten bada, proiektu osoak inbertsiorako laguntzak lortzeko aukera galduko du.
2008ko urriaren 15ean bukatuko da eskabideak aurkezteko epea, 2007-2008 bitartean laguntza jasotzen ahal duten Nafarroako Foru Komunitateko eskualdeetarako. Foru agindu honen I. eranskineko 2. puntuan adierazi dira eskualde horiek.
3. Laguntzarako eskabideak eredu normalizatuetan aurkeztuko dira. Eredu horiek Nekazaritza, Abeltzaintza eta Elikadura Departamentuko Erregistroan, nekazaritza bulegoetan eta Nafarroako Gobernuaren www.navarra.es webguneko atariko zerbitzuen katalogoan eskuratzen ahal dira.
4. Eskabideak jaso ondoren, dokumentazioa osorik dagoen begiratuko da. Behar izanez gero, interesatuari hogeita hamar eguneko epea emanen zaio hutsuneak betetzeko, eta ohartaraziko zaio hala egiten ez badu eskabidea bertan behera utzi duelakoan hura artxibatzeko ebazpena emanen dela eta ebazpen hori jakinarazi eginen zaiola.
5. Eskabidea osorik egon ondoren, egiaztatuko da eskatzen diren betebeharrak betetzen dituela. Horretarako behar diren kontrolak eginen dira. Jarraian eskabidea ebaluatu eginen da eta laguntzaren zenbatekoa zehaztuko da, diruz lagundu daitekeen aurrekontuaren eta kasu bakoitzean aplikatu beharreko baremoaren arabera.
6. Proposaturiko kostuak gehiegizkoak ez direla egiaztatzeko, aurrekontuak eta proformako fakturak ebaluatuko dira.
7. Ebaluazioa bukaturik, kudeaketa unitateak laguntza emateko ebazpen proposamena aurkeztuko du, non eskatzaileak bete beharreko baldintza eta betebeharrak zehaztuko baitira. Interesatuari sei hilabeteko epean jakinaraziko zaio, eskaera aurkezten duenetik hasita.
-Epea etenik geldituko da organo eskudunak argibideak edo agiri osagarriak eskatzen dituenean, errekerimendua jakinarazten denetik interesatuak betebeharrak betetzen dituenera edo, hala ez bada, eman zaion epea bukatzen denera. Epe hori iragan eta laguntza emateko ebazpenik jakinarazi ez bada, interesatuak zilegi izanen du eskaera ukatu dela ulertzea.
8. Dirulaguntzak emateko ebazpenean onuradunari ezartzen zaizkion baldintzak eta bete beharrekoak, izanen dira, besteak beste, proiektuak betetzeko eta abian jartzeko epeei buruzkoak; epe horiek gehienez ere bi urtekoak izanen dira, laguntzak ematen diren egunetik hasita, edo 30 hilabetekoak, eskabidea aurkezten den egunetik hasita. Kasu berezietan, Nekazaritza, Abeltzaintza eta Elikadura Departamentuak luzapen bat ematen ahal du, arrazoitutako eskaera aldez aurretik eginez gero betiere.
9. Ebazpenaren aurka gora jotzeko errekurtsoa jar daiteke, Nekazaritza, Abeltzaintza eta Elikadura Departamentuko kontseilariari zuzendua, gehienez ere hilabeteko epean jakinarazpena jasotzen denetik kontatzen hasita.
12. artikulua. Eskabideak aldatzea.
1. Arrazoiak emanda, inbertsio proiektuari loturiko aldaketa nabarmenak egin behar direnean, behin dirulaguntzak emateko ebazpena onartu ondoren, proiektu osagarria edo ordezko proiektua aurkezten ahalko da. Proiektu hori hasierako proiekturako prozedura berari jarraituz onetsi beharko da. Bidezkoa bada, laguntza doitu eginen da. Doitze horrek ez du esan nahi hasiera batean onarturiko laguntzak gehituko direla. Aldaketak onartzeak ez du inoiz ekarriko baremoaren aplikazioa aldatu eta laguntzaren intentsitatea gehitzea.
2. Honakoak joko dira aldaketa nabarmentzat:
-Produkzioaren orientazioa aldatzea, sektorearen, produktu landuaren edo kudeaketa sistemaren aldetik.
-Enpresaren katalogazioa aldatzea, haren tamaina edo enpresa-tipologiaren aldetik edo inbertsioen kokapenaren aldetik.
-Hasiera bateko obra zibilaren, makinen edo ekipamenduaren osagaiak %20 gehitu, kendu edo aldatzea.
-Inbertsioen kokapena aldatzea.
13. artikulua. Laguntzen ordainketa.
1. Instalazioak martxan jartzen direnetik, laguntzak, gehienez ere, lau urtetan ordainduko dira. Hala ere, kasuan kasuko ekitaldiko aurrekontuan behar adina baliabide izanez gero, urtekoren baten ordainketa aurreratu ahal izanen da, betiere inbertsioaren erdia, gutxienez, gauzatu eta gero.
2. Urtekoaren ordainketa aurreratuak gauzaturik eta ordaindurik dauden inbertsioenak izanen dira. Inbertsio proiektua ongi amaituko dela bermatzeko, proiektua erabat burutu gabe eta gastuen ordainketa justifikatu gabe dauden bitartean, onuradunek aurretiazko abala jarri beharko dute, aurreraturik jasoko dituzten kopuruengatik.
3. Onuradunak, ezarritako epean inbertsioak amaitu ondoren, Nekazaritza, Abeltzaintza eta Elikadura Departamentuari justifikazioa aurkeztu beharko dio, horretarako ezarritako formularioaren bidez, inbertsioak amaitu eta hilabeteko epean. Horretarako ezarritako formularioan, proiektaturiko inbertsioen eta egindakoen zerrenda jarriko da, laguntzak emateko ebazpenean ageri diren hurrenkera berean, eta jatorrizko fakturak, ordainagiriak eta horien guztien fotokopia bana erantsiko dira. Ordainagiriek, gutxienez, emandako laguntzen zenbatekoen parekoak izan behar dute, baina eskatzailea ez dago beharturik funts publikoekin finantzatu ez diren gastuen soberakina justifikatzera.
4. Halaber 10. artikuluan aipatutako obra eta jarduera lizentziaren inguruko agiriak erantsiko dira, eskabidearekin batera aurkeztu ez badira.
Jarduera sailkaturako baimena edo ingurumen baimen integratua eta/edo obretarako lizentzia tramitatzen ari badira, onuradunak lizentzia eta baimen horiek aurkeztu beharko ditu, emandako laguntza ordain diezaioten, ez baditu aurkeztu laguntzetarako eskabidearekin batera. Jarduera sailkaturako lizentzia edo ingurumen baimen integratua eta/edo obretarako lizentzia lortu ezean, indarrik gabe utziko dira emandako laguntzak.
5. Laguntzak ordaindu aitzin, behar adinako abala eskatuko da, diruz lagundu daitezkeen inbertsioak osorik pagatu ez badira, justifikatu gabeko ordainketei dagokien dirulaguntzaren adinakoa. Abalak baliozkoa izan behar du harik eta enpresak frogatu arte diruz lagundu daitekeen inbertsioa osorik ordaindu dela.
6. Nekazaritzako Elikagai Industrien eta Nekazaritzako Ustiategien Zerbitzuak behar adina kontrol eginen ditu arautegi indarduna eta onuradunak hartutako konpromisoak betetzen direla eta inbertsioa aurkeztutako proiekturako benetan erabili dela egiaztatzeko. Kontrolen emaitzak ikusirik, bidezko diren ordainketak baimendu eta dirulaguntzen ordainketaren gaineko ebazpen proposamena prestatuko du.
7. Onuradunak inbertsio proiektuari dagokion inskripzioa egin beharko du Nekazaritzako Elikagai Industrien Erregistroan, dirulaguntzaren azken ordainketatik hasita urtebeteko epean. Enpresak Nekazaritzako Elikagai Industrien Erregistroko inskripzioa behar den epean egiten ez badu, jasotako laguntzak itzuli beharko ditu, justifikatutako arrazoiren bat izan ezean.
14. artikulua. Ez-betetzeen mailakatzea, murrizketak eta salbuespenak.
1. Inbertsio proiektua buruturik, egiazko inbertsioaren zenbatekoa onetsiriko inbertsiotik beherakoa baldin bada, laguntzen zenbatekoa doituko da, proportzioan gutxituz, inolako zehapenik gabe, baldin eta Nekazaritza, Abeltzaintza eta Elikadura Departamentuak uste badu eginiko planek balio dutela.
2. Espediente egoki baten bidez, onuradunak nahita gezurrezko adierazpen bat egin duela frogatuz gero, onarturiko laguntzak indargabetu eta haiengatik pagaturiko zenbateko guztiak berreskuratuko dira. Gainera, Dirulaguntzei buruzko azaroaren 9ko 11/2005 Foru Legean ezarritako zehapenak jarri ahalko dira.
15. artikulua. Gero betetzeko konpromisoak.
1. Foru agindu honetako 5. artikuluan aipatzen diren konpromisoak bete ezik, laguntzak hein batean edo osorik itzuli beharko dira.
2. Bete gabe utzitzat hartuko da 5.b) artikuluan aipatzen den konpromisoa, baldin eta laguntzen azken ordainketaren ondoko bost urteko epean industria jarduera amaitzen bada, negozioa itxita, edo enpresak lantegia edo helbide soziala lekuz aldatzen badu, Nafarroatik kanpora edo laguntzaren kalkuluan kontuan hartu zen eskualdetik kanpora eramanez, edo hasierako aurreikuspenen aldean inbertsio proiektuan aldaketa garrantzitsuak egiten badira, edo enpresaren krisi espedientea, enpleguaren edo lanaldiaren erregulazioa, ordainketa etendura edo porrota gertatzen bada.
3. Aurreko atalean aipatzen diren konpromisoen ez-betetzea mailakatu eta itzuli beharreko zenbatekoa zehazteko, irizpide hauei jarraituko zaie:
a) Jarduera bertan behera uztea: %100.
b) Porrota: %100
c) Instalazioak edo helbide soziala Nafarroatik kanpora eramatea: %100.
d) Instalazioak Nafarroako beste eskualde batera eramatea: %10
e) Kalitatezko produktuen ekoizpena bertan behera uztea: %10
f) Ordainketa etendura, krisi espedientea edo enplegu erregulazioa gertatuz gero, enpresak enpresa-plan bat aurkeztu beharko du, zeinetatik bideragarritasun ekonomikoa ondorioztatuko baita. Enpresa onuradunaren bideragarritasun ekonomikoa egiaztatu ezean, jasotako laguntzak itzultzeko eskatuko zaio.
4. Onuradunak idatziz jakinaraziko ditu ezinbesteko kasuak edo salbuespenezko inguruabarrak, bidezko diren frogak erantsiz, hala egiten ahal duenetik hamar egun balioduneko epean.
16. artikulua. Onuradunen betebeharrak.
Foru agindu honetan aurreikusten diren laguntzen onuradunek ondokoa bete behar dute:
a) Nekazaritza, Abeltzaintza eta Elikadura Departamentuak onartu edo emandako dirulaguntzen gaineko egiaztapenak onartzea.
b) Kasuan kasuko inbertsioari dagokion inskripzioa egitea Nekazaritzako Elikagai Industrien Erregistroan, dirulaguntzaren azken ordainketatik hasita urtebeteko epean.
c) Helburu bereko beste dirulaguntza publikoren bat eskatu edo jasotzen badute, Nekazaritza, Abeltzaintza eta Elikadura Departamentuari jakinaraztea.
d) Kontabilitate edo erregistro liburuan laguntza jaso izana erregistratzea, indarreko arauen arabera horrelako liburuak izatera behartuta baldin badaude.
e) Onuraduna kooperatiba bada, Nafarroako kooperatibei buruzko abenduaren 11ko 14/2006 Foru Legearen 45. artikuluko 12. idatz-zatian xedatutakoa betetzea, kapital dirulaguntzak ondareari edo ustiapen kontuari eranstea dela-eta.
f) Nekazaritza, Abeltzaintza eta Elikadura Departamentuan frogatzea jasotako funtsak laguntza emateko arrazoi izan ziren helburuetarako erabili direla, jarritako epe eta moduan.
g) Nekazaritza, Abeltzaintza eta Elikadura Departamentuari 15. artikuluko 3. eta 4. puntuetan aipatutako gorabehera guztiak idatziz jakinaraztea, gertatzen diren orduko.
17. artikulua. Itzulketak, arau-hausteak eta zehapenak.
1. Foru agindu honetan aipatzen diren laguntzei buruzko itzulketak, arau-hausteak eta zehapenak, Europar Batasuneko arautegian xedaturikoa galarazi gabe, Dirulaguntzei buruzko azaroaren 9ko 11/2005 Foru Legean xedaturikoarekin bat etorriko dira.
2. Arau-hausteak finkatzeko eta zehapenak ezartzeko Administrazioak erabiltzen duen prozedurak abenduaren 9ko 369/1997 Foru Dekretuak agintzen duena hartuko du aintzat. Foru dekretu horren bidez nekazaritza, abeltzaintza eta elikagaien arloetan zehapenak ezartzeko administrazio prozedura ezarri zen.
18. artikulua. Informazioa artxibatzea.
Nekazaritza, Abeltzaintza eta Elikadura Departamentuak jatorrian altxatuko du eskuratu behar duen informazioa, Europar Batasunak jarraipen, ebaluazio eta kontrol eginkizunetarako jartzen dituen baldintzak betetzeko, eta Nekazaritza, Arrantza eta Elikadura Ministerioari bidaliko dio Batasuneko instituzioenganako eginkizunak betetzeko behar den informazioa.
Lehen Xedapen Gehigarria. 2007ko urtarrilaren 1a baino lehen aurkezturiko eskabideak.
Azaroaren 20ko 361/2000 Foru Dekretuaren babesean 2007ko urtarrilaren 1a baino lehen aurkeztutako laguntza eskabideak ezetsi eta artxibatu eginen dira. Foru dekretu horrek inbertsioa eta enplegua sustatzeko laguntzetarako araubide berria ezarri zuen, Itunaren I. eranskinean ageri ez diren nekazaritzako produktuak eraldatu eta merkaturatzeko nekazaritzako elikagaien industriei zegokienez.
Eskabideen espedienteak foru agindu honetan ezarritako baldintza berriei egokitzeko behar diren agiriak 2 hilabeteko epean aurkeztu behar dira, foru agindu honek indarra hartzen duenetik hasita.
Bigarren Xedapen Gehigarria. Aurrekontuko kontusaila.
Foru agindu honen aplikazioak sortzen dituen gastuak 721002- 72210-7701-412102, "Nekazaritza industrializatzeko eta merkaturatzeko inbertsiorako dirulaguntzak, EGP (LGENF)" delako kontusailaren kargura ordainduko dira, 2007ko eta hurrengo ekitaldietako Nafarroako Aurrekontu Orokorretatik.
Xedapen Indargabetzaile Bakarra. Indargabetutako arauak.
Indarrik gabe geldituko dira foru agindu honetan ezarritakoari kontra egiten dioten maila bereko edo beheragoko xedapen guztiak, eta bereziki 2001eko uztailaren 2ko Foru Agindua, Nekazaritza, Abeltzaintza eta Elikadura kontseilariak emana, azaroaren 20ko 361/2000 Foru Dekretua aplikatu eta garatzen duena. Foru dekretu horren bitartez, inbertsioa eta enplegua sustatzeko laguntzetarako araubide berria ezarri zen, Itunaren I. eranskinean ageri ez diren nekazaritzako produktuak eraldatu eta merkaturatzeko nekazaritzako elikagaien industriei zegokienez.
Azken Xedapen Bakarra. Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
I. ERANSKINA. Eskualde-xedeko laguntzen mapa
Eskualde-xedeko 2007-2013 bitarteko estatu-laguntzei buruzko gidalerroak -Eskualde-laguntzen mapa: Espainia. (2007/B 35/03); N 626/06- Espainia.
(Batzordeak 2006-12-20an onetsia)
1.-Nafarroako udalerri hauek jaso dezakete laguntza 2007-2013 bitartean, EE Itunaren 87. artikuluko 3. idatz-zatiko c) letraren arabera:
Abaigar, Abartzuza, Abaurregaina, Abaurrepea, Aberin, Agoitz, Aguilar Kodeskoa, Allin, Allo, Ameskoabarren, Antzin, Anue, Araitz, Aranaratxe, Arcos (Los), Arellano, Aria, Aribe, Armañantzas, Arroitz, Artzibar, Atetz, Auritz, Azuelo, Barasoain, Barbarin, Bargota, Basaburua, Baztan, Beire, Betelu, Bidankoze, Burgi, Busto (El), Cabredo, Deierri, Deikaztelu, Desojo, Elo, Erroibar, Erromantzatua, Erronkari, Eslaba, Espartza, Esprontzeda, Esteribar, Etaio, Eulate, Ezkabarte, Ezkaroze, Ezporogi, Galipentzu, Galoze, Garaioa, Garde, Garinoain, Garralda, Gazteluberri, Genevilla, Gesalatz, Goñibar, Gorza, Hiriberri Aezkoa, Ibargoiti, Iguzkitza, Imotz, Irunberri, Itza, Itzagaondoa, Itzaltzu, Izaba, Jaitz, Jaurrieta, Kaseda, Lana, Lantz, Lapoblación, Larragoa, Larraun, Leatxe, Legaria, Lekunberri, Leotz, Lerga, Lezaun, Lizoainibar, Longida, Lukin, Luzaide, Mañeru, Marañón, Mendatza, Metauten, Mirafuentes, Morentin, Mues, Murieta, Nabaskoze, Nazar, Odieta, Oibar, Oko, Olaibar, Olexua, Ollaran, Oloritz, Orbaizeta, Orbara, Orisoain, Orontze, Orotz-Betelu, Orreaga, Oteitza, Otsagabia, Piedramillera, Pitillas, Puiu, San Martin Unx, Santsol, Sartze, Sorlada, Torralba del Río, Torres del Río, Txulapain, Ultzama, Untziti, Untzue, Urdazubi, Urraulbeiti, Urraulgoiti, Urrotz, Urzainki, Uxue, Uztarroze, Villamayor de Monjardín, Zare, Zirauki, Zugarramurdi, Zuñiga.
2.-Nafarroako eskualde hauek jaso dezakete laguntza 2007-2008 bitartean, EE Itunaren 87. artikuluko 3. idatz-zatiko c) letraren arabera:
Ablitas, Adios, Aiegi, Villafranca, Altsasu, Añorbe, Arakil, Arano, Arantza, Aras, Arbizu, Areso, Arguedas, Arruazu, Artaxoa, Artazu, Azkoien, Bakaiku, Barillas, Beintza-Labaien, Belaskoain, Bera, Berbintzana, Bertizarana, Bidaurreta, Biurrun-Olkotz, Buñuel, Cabanillas, Cadreita, Caparroso, Cascante, Castejón, Cintruénigo, Corella, Cortes, Donamaria, Doneztebe, Elgorriaga, Elizagorria, Eneritz, Eratsun, Ergoiena, Erriberri, Esa, Etxalar, Etxarri Aranatz, Etxauri, Ezkurra, Faltzes, Fitero, Fontellas, Funes, Fustiñana, Gares, Girgillao, Goizueta, Igantzi, Irañeta, Irurtzun, Ituren, Iturmendi, Lakuntza, Larraga, Ledea, Legarda, Leitza, Lesaka, Lizarra, Lodosa, Martzilla, Mélida, Mendabia, Mendigorria, Milagro, Miranda Arga, Monteagudo, Murchante, Murillo el Cuende, Murillo el Fruto, Muruzabal, Obanos, Oitz, Olazti, Petilla de Aragón, Ribaforada, Saldias, Santakara, Sartaguda, Sesma, Sunbilla, Tafalla, Tiebas-Muru Artederreta, Tirapu, Tulebras, Tutera, Uharte Arakil, Ukar, Urdiain, Urrotz, Uterga, Valtierra, Viana, Villatuerta, Xabier, Zangoza, Zarrakaztelu, Ziordia, Ziritza, Zubieta.
