navarra.es
Castellano | Euskara | Français | English
Ezagutzera eman
298/2009 Ebazpena, otsailaren 23koa, Hezkuntza Departamentuko Giza Baliabideen Zerbitzuko zuzendariak emana, irakaskuntza ez-unibertsitarioko irakasle funtzirioei 2009-2010 ikasturterako behin-behineko destinoak, praktikaldikoak ...
298/2009 EBAZPENA, otsailaren 23koa, Hezkuntza Departamentuko Giza Baliabideen Zerbitzuko zuzendariak emana, irakaskuntza ez-unibertsitarioko irakasle funtzirioei 2009-2010 ikasturterako behin-behineko destinoak, praktikaldikoak eta zerbitzu eginkizunetakoak esleitzeko jarraibideak eta irakasleen lanaldia murrizteko eskaeren prozedura onesten dituena
(2009ko 29. NAOn argitaratutako testua, martxoaren 9an)
Atariko
Administrazio honen mendeko ikastetxe eta programetan aurrez ikusitako eskolatzearen bilakaerak eta lanpostuak betetzeko ikasturte honetan onetsitako deialdien ebazpenak neurriak hartzera behartzen dute, irakaskuntza ez-unibertsitarioko irakasle funtzionarioei 2009-2010 ikasturterako behin-behineko lanpostua azkar eta modu eraginkorrean esleitu ahal izateko.
Bestalde, Nafarroako Foru Komunitateko ikastetxeen sarea berrantolatzeko arauak ematen dituen martxoaren 13ko 69/1995 Foru Dekretuak, martxoaren 13ko 150/1996 Foru Dekretuaren bidez aldatu zenak, adierazten du zenbait neurri hartu behar direla, aplikagarria den araudi osagarria Administrazio honen benetako egoerari egokitzeko.
Horretarako, bidezkoa da 2009-2010 ikasturterako behin-behineko destinoak, praktikaldikoak eta zerbitzu eginkizunetakoak esleitzeko jarraibideak ematea. Ildo horri jarraikiz, batetik, funtzionarioek herrian edo eskualdean segitzeko eskubidea badute, eskubide hori bermatuko zaie eta, bestetik, funtzionarioek euskaraz irakasteko konpromisoa hartu badute, konpromiso hori betetzen dela ziurtatuko da.
Apirilaren 28ko 113/1997 Foru Dekretuak Nafarroako Foru Komunitateko Administrazioaren zerbitzuko langileen lanaldia murrizteko arauak ematen ditu eta 4. artikuluan ezartzen du irakasle ez-unibertsitarioen lanaldiaren murrizketa ikasturtea amaitu arte izanen dela. Hortaz, eskatzen diren luzapenak ikasturte osorako izanen dira.
Irakasleen lanaldi murrizketak onartzeak eragina izan dezake ikastetxeetako plantillak zehazterakoan eta, horrenbestez, destinoko ikastetxea behin-behinekoz aldatzea ekar dezakeen egoera batek ukitzen dituen irakasleak zehazterakoan. Horregatik, komeni da lanaldi murrizketak plantillak eratu aurretik eskatzeko prozedura ezartzea, ahalik eta lekualdatze gutxien izan dadin. Lanaldi murrizketak ematerakoan lehentasuna izanen du beti ikasleek hezkuntzarako duten eskubideak.
Horiek horrela, Hezkuntza Departamentuko Ikuskapenaren eta Zerbitzuen zuzendari nagusiak irailaren 19an emandako 155/2007 Ebazpenaren bidez esleitu zaizkidan ahalmenak erabiliz, ebatzi dut:
1. Irakaskuntza ez-unibertsitarioko irakasle funtzionarioei 2009-2010 ikasturterako behin-behineko destinoak, praktikaldikoak eta zerbitzu eginkizunetakoak esleitzeko jarraibideak eta irakasleen lanaldia murrizteko eskaeren prozedura onestea. Hona:
Oinarriak
I.-Behin-behineko destinoak, praktikaldikoak eta zerbitzu eginkizunetakoak esleitzeko jarraibideak
Hezkuntza Departamentuak 2009-2010 ikasturterako behin-behineko destinoa, praktiketakoa edo zerbitzu eginkizunetakoa esleituko du, oinarri hauetan ezarritako arauei jarraikiz.
Lehena. Arau komunak.
Behi-behineko destinoak, praktiketakoak eta zerbitzu-eginkizunetakoak, ekitaldi irekian esleitzen direnean, honako ordeenari jarraituko zaio:
1. Funtzionarioaren osasun-egoeraren ondoriozko zerbitzu eginkizunak.
2. I.-Irakaslanik ez izateagatik beren ikastetxetik aldarazitako irakasleen zerbitzu eginkizunak.
3. II.-Euskaraz irakasteko konpromisoa betetzeko, beren ikastetxetik aldarazitako irakasleen eginkizun-zerbitzuak.
4. Behin-behineko destinoa duten funtzionarioak.
5. Gorabehera berezien ondoriozko, zerbitzu eginkizunak.
6. Praktiketako funtzionarioak:
7. Irakaskuntzako lanpostuetarako prestakuntzarako zerbitzu berezietan aritzeko izangaiak.
Irakaslanik ezak eta euskaraz irakasteko konpromisoa bete beharrak sorrarazitako zerbitzu eginkizunak bigarren eta hirugarren arauetan ezarritakoaren arabera esleituko dira. Antolamendu arrazoien ondoriozko zerbitzu eginkizunak ikastetxe jakin bati esleituko zaizkio eta osasun kontuen, gorabehera ezohikoen eta hautetsi karguaren ondoriozkoak ikastetxe jakin bati edo egintza publikoan esleituko dira, oinarri honetako bostgarren arauko 5. puntuan aurreikusitako Ebaluazio Batzordeak ezarritakoaren arabera.
Lanpostuak hautatu ahal izateko gaikuntza eduki behar da edo espezialitate eta hizkuntzako titularra izan. Behin betiko destinoko herrian edo eskualdean irakaslearen espezialitateko eta hizkuntzako lanpostu hutsik ez badago, beste lanpostu bat esleitzen ahal zaie, Hezkuntza Departamentuak ezartzen dituen irizpideei jarraikiz, irakaslanik ez izateagatik aldarazitako irakaslea destinoko herritik mugiaraztea saihesteko.
DBHko lehen bi kurtsoetako lanpostuak eskuratzen ahalko dituzte, bakar-bakarrik, behin betiko destinoa DBHko lehen bi kurtsoetan izan arren irakastordu nahikoa ez izateagatik lekuz aldatu dituzten maisu-maistrek, bai eta, gaikuntza izanik, DBHko lehen bi kurtsoetan Pedagogia Terapeutikoko lanpostuak lortu nahi dituzten maisu-maistrek ere.
Euskaraz irakasteko lanpostuak aukeratu ahal izateko, EGA agiria edo baliokidea eduki beharko da.
Lanpostuak esleitzeko jendaurreko ekitaldiak zein egunetan eginen diren aldez aurretik jakinaraziko da iragarkia jarriz prentsan edo Hezkuntza Departamentuaren web orrian: www.pnte.cfnavarra.es.
Interesdunak berak edo bere ordezkari batek -betiere interesdunaren nortasun agiriaren fotokopia eta ordezkariari baimena emateko idazki bat aurkezten baditu- parte hartzen ahalko du lanpostuak aukeratzeko jendaurreko ekitaldietan.
Eskaintzen diren lanpostuak, eta 2009-2010 ikasturterako behin-behineko beste destino bat aukeratu behar duten edo zerbitzu eginkizunetan izanen diren funtzionarioen izen-deiturak, jarraibide hauetan aipatzen diren jendaurreko ekitaldi orotan, jendaurrean paratuko dira Hezkuntza Departamentuko Argibide eta Agiri Bulegoan eta Hezkuntza Departamentuaren web orrian (www.pnte.cfnavarra.es), destinoak esleitzeko jendaurreko ekitaldiak egin baino lehen.
Bigarrena. Irakaslanik ez izateagatik beren ikastetxetik aldarazitako irakasleak.
1.-Behin betiko destinoa duten irakasleek euren ikastetxean segituko dute 2009-2010 ikasturtean, ikastetxe horretan irakaslana badute.
2.-Behin betiko destinoko irakasleak, 2008-2009 ikasturtean irakaslanik ez izateagatik aldarazi badituzte eta 2009-2010 ikasturtean egoera horretan segitzen badute, destinoko ikastetxean bertan zerbitzu eginkizunetan egonen dira, eman dezaketen espezialitate batean behar beste ordu egonez gero, non eta ez duten idatziz adierazten, 2009ko martxoaren 31 baino lehen, beste lanpostu bat hautatu nahi dutela.
3.-Lekuz aldarazi berriak.
Behin betiko destinoko irakasleek, beren behin betiko destinoko ikastetxetik edo 2008-2009 ikasturtean aritu zireneko ikastetxetik aldarazi behar badituzte, hurrengo ikasturtean zerbitzu eginkizunetan aritzeko lanpostu bat aukeratuko dute horretarako propio deituko den jendaurreko ekitaldi batean.
4.-Hezkuntza maila berean espezialitate eta hizkuntza bereko lanpostuak ikastetxe berean dituzten Maisu-maistren eta Bigarren Hezkuntzako Katedradunen eta Irakasleen Kidegoetako irakasle batzuen artean erabaki behar denean zein joanen den zerbitzu eginkizunetan behin betiko destinotik behin-behineko batera, baldin eta horietako bakar batek ere bere borondatez lekuz aldatu nahi ez badu, irizpide hauek aplikatuko dira:
-Lekuz aldatzea dakarren irakastordu murrizketa Derrigorrezko Bigarren Hezkuntzako lehen eta bigarren kurtsoan soilik izaten bada, Maisu-maistren Kidegoko funtzionarioa aldatuko da, ebazpen honen 5. atalean kidego horretarako orokorki ezarritako irizpideei jarraikiz.
-Lekua aldatzea dakarren irakastordu murrizketa Derrigorrezko Bigarren Hezkuntzako hirugarren eta laugarren kurtsoan eta/edo Batxilergoan soilik izaten bada, Bigarren Hezkuntzako Katedradunen eta Irakasleen Kidegoko funtzionarioa aldatuko da, ebazpen honen 5. atalean kidego horretarako orokorki ezarritako irizpideei jarraikiz.
-Lekuz aldatzea dakarren irakastordu murrizketa Derrigorrezko Bigarren Hezkuntzan, eta/edo Batxilergoan, batera izaten bada, Maisu-maistren Kidegoko funtzionarioa aldatuko da, ebazpen honen 5. atalean kidego horretarako orokorki ezarritako irizpideei jarraikiz.
5.-Espezialitate eta hizkuntza bereko lanpostuak betetzen dituzten irakasle batzuen artean erabaki behar denean zein dagoen behartua behin betiko destinotik behin-behinekoz ikastetxez aldatzera (zerbitzu eginkizunetan) eta, horri jarraikiz, irakasle horietako batek ere ez badu bere borondatez ikastetxez aldatzea erabakitzen, bata bestearen jarraian aplikatuko dira hurrengo irizpideak berdinketa kasuetan:
-Toki entitateetatik datozen irakasleen eta maisu-maistren kidegoa:
1.) Ikastetxean behin betiko lanpostuan etengabeko antzinatasun txikiena. Ondorio hauetarako, beste toki entitate batzuetatik heldu diren funtzionarioen antzinatasun data, Maisu-maistren kidegoan sartu gabeak badira, Nafarroako Gobernuan funtzionario bihurtu zirenekoa izanen da.
2.) Maisu-maistren kidegoan karrerako funtzionario gisa zerbitzuak ematen benetako denbora laburrena. Kidegoan abenduaren 30eko 31/1991 Legearen xedapen gehigarrietako 29.ari jarraikiz sartu ziren irakasleei dagokienez, Maisu-maistren Kidegoko karrerako funtzionario gisa zuten antzinatasunari lan-kontratudun finko gisa egiaztaturik dutena gehituko zaio, lehen zerbitzu urtea kenduta.
Toki entitateetatik etorritako funtzionarioei, Maisu-maistren kidegoan sartu gabeak badira, toki entitatearekin lan kontratu finkoa sinatu ondoren emandako zerbitzuak konputatuko zaizkie benetako zerbitzu gisa. (Ez da puntuatuko zerbitzuko lehenbiziko urtea).
3.) Kidegoan sartzeko urterik hurbilena.
Irizpide hau ez zaie aplikatuko toki entitateetatik heldu diren funtzionarioei. Halakoetan irizpide hau aplikatuko da: kasuan kasuko hautapen prozeduran lortutako puntuazio txikiena.
4.) Kidegoan sartzeko hautapen prozeduran erdietsiriko zerrenda-zenbakirik altuena edo puntuaziorik txikiena.
-Bigarren Hezkuntzako Katedradunen eta Irakasleen eta Lanbide Heziketako Irakasle Teknikoen Kidegoak.
1.) Funtzionarioa zein kidegotakoa den, hartan karrerako funtzionario gisa zerbitzuak ematen denbora laburrena. Abenduaren 30eko 31/1991 Legearen xedapen gehigarrietako 29.ari jarraikiz kidegoetan sarturiko irakasleei dagokienez, Bigarren Hezkuntzako Irakasleen eta Lanbide Heziketako Irakasle Teknikoen Kidegoetako karrerako funtzionario gisa zuten antzinatasunari lan-kontratudun finko gisa egiaztaturik dutena gehituko zaio, lehen zerbitzu urtea kenduta.
2.) Ikastetxean behin betiko lanpostuan etengabeko antzinatasun txikiena.
3.) Kidegoan sartzeko urterik hurbilena.
4.) Katedradunen Kidegokoa ez izatea.
5.) Kidegoan sartzeko hautapen prozeduran erdietsiriko puntuaziorik txikiena.
Hori dena, Katedradunen Kidegoko funtzionarioei dagozkien eskubideak galarazi gabe, baldin eta Hezkuntza Sistemaren Antolamendu Orokorrari buruzko Lege Organikoak indarra hartu aurretik erdietsi bazuten lanpostua.
-Ekonomia, Lanerako Prestakuntza eta Orientazioa eta Teknologia ematen duten irakasleak:
Ekonomiako, Lanerako Prestakuntza eta Orientazioko eta Teknologiako lanpostuak betetzen dituzten hainbat irakasleren artean erabaki behar denean zein dagoen behartua behin betiko destinotik behin behinekoz ikastetxez aldatzera (zerbitzu eginkizunetan) eta, horri jarraikiz, irakasle horietako batek ere ez badu bere borondatez ikastetxez aldatzea erabakitzen, Bigarren Hezkuntzako Katedradunen eta Irakasleen eta Lanbide Heziketako Irakasle Teknikoen Kidegoetarako ezarritako irizpide orokorrak aplikatuko dira, inola ere galarazi gabe, hala behar denean, kasuko espezialitatearen titular den funtzionarioari onartuko zaion lehentasuna.
-Lanbide Hastapeneko Programetako irakasleak:
Ikastetxe batean, Lanbide Hastapeneko Programetan behin betiko destinoa duten irakasle guztiek bertan eskola eman ahal izateko adina irakastordu ez baldin badago, irakastordurik gabe gelditutako irakasleak, titulazio egokia ez dutenak salbu, behartuak izan daitezke lekuz aldatzera, edo curriculum aniztasuneko zein curriculum egokituko unitateetan edo lanbide heziketako heziketa zikloetan eskola ematera.
Lanbide Hastapeneko Programetako lanpostuak betetzen dituzten zenbait irakasleren artean erabaki behar denean zein dagoen behartua behin betiko destinotik behin behinekoz ikastetxez aldatzera (zerbitzu eginkizunetan) eta, horri jarraikiz, irakasle horietako batek ere ez badu bere borondatez ikastetxez aldatzea erabakitzen, Bigarren Hezkuntzako Katedradunen eta Irakasleen eta Lanbide Heziketako Irakasle Teknikoen Kidegoetarako ezarritako irizpide orokorrak aplikatuko dira.
6.-Lehentasun ordena.
Irakaslanik ez izateagatik beren ikastetxetik aldarazitako irakasleek lanpostuak aukeratzeko ordena zehazterakoan, behin betiko destinoko herria edo eskualdea izanen da kontuan eta, berdinketarik gertatzen bada, hurrengo irizpideak aplikatuko dira bata bestearen jarraian:
1. Beraiei dagokien kidegoan eman dituzten zerbitzuak. Abenduaren 30eko 31/1991 Legearen xedapen gehigarrietako hogeita bederatzigarrenari jarraikiz, kidegoetan sartutako irakasleei lehenengo zerbitzu urtea kenduko zaie, praktikalditzat jotzen baita. Ondorio horietarako, 2009ko maiatzaren 1a arte emandako zerbitzuak kontatuko dira.
Toki entitateetatik etorritako funtzionarioei, irakasleen kidegoetan sartu gabeak badira, toki entitate haiekin lan kontratu finkoa sinatu ondoren emandako zerbitzuak konputatuko zaizkie benetako zerbitzu gisa. (Ez da puntuatuko zerbitzuko lehenbiziko urtea).
2. Kidegoan zein urtetan sartu ziren, nor lehenago. Ondorio hauetarako, beste toki entitate batzuetatik heldu diren funtzionarioen antzinatasun data, irakasleen kidegoetan sartu gabeak badira, Nafarroako Gobernuan funtzionario bihurtu zirenekoa izanen da.
3. Maisu-maistren Kidegoan sartzeko hautapen prozeduran erdietsiriko zerrenda-zenbaki baxuena edo kidegoan sartzeko hautapen prozeduran erdietsiriko puntuaziorik altuena.
Toki entitateetatik etorritako funtzionarioen kasuan, irakasleen kidegoetan sartu gabeak badira, aplikatzeko irizpidea hau da: kasuan kasuko hautapen prozeduran lortutako puntuazio txikiena.
Behin betiko destinoko herrian edo eskualdean irakaslearen espezialitateko lanpostu hutsik ez badago, beste lanpostu bat esleitzen ahalko zaio, baina irakaslanik ez izateagatik aldarazitako irakasleek (kasuan kasuko espezialitateko titularrek) lehentasuna izanen dute destinoa hautatzerakoan.
Hirugarrena. Euskaraz irakasteko konpromisoa betetzeko ikastetxez aldarazitako irakasleak.
I.-Euskaraz irakasteko konpromisoa bete behar duten irakasleek, hots, behin betiko destinoa dutenek, beren destinoko ikastetxean berean beteko dute konpromisoa, betiere irakats dezaketen espezialitate batean nahiko ordu emateko aukera badute.
Maisu-maistren Kidegoko funtzionarioek lanpostu hauetan ere betetzen ahalko dute irakasle lana: Lehen Hezkuntza euskaraz, Euskal Filologia eta Euskara, eta Bigarren Hezkuntzako irakasleen kidegokoak, berriz, A ereduko Euskal Hizkuntza eta Literaturako lanpostuetan ere aritzen ahalko dira.
2.-Behin betiko destinoko irakasleek, 2008-2009 ikasturtean konpromiso hori betetzeko aldarazi badituzte eta egoera horretan segitzen badute, destinoko ikastetxean bertan zerbitzu eginkizunetan jarraituko dute, eman dezaketen espezialitate batean behar beste ordu egonez gero, non eta ez duten idatziz adierazten, 2009ko matxoaren 31 baino lehen, beste lanpostu bat hautatu nahi dutela.
3.-Lekuz aldarazi berriak.
Konpromiso hori hartu duten irakasleek, behin betiko destinoa badute eta beren ikastetxean berean betetzerik ez badute, zerbitzu eginkizunetan ikastetxez aldaraziko dituzte. Destinoa aldatu behar duten irakasleek eginen den jendaurreko ekitaldi batean aukeratuko dute hurrengo ikasturterako lanpostu berria.
4.-Lehentasun ordena.
Euskaraz irakasteko konpromisoa betetzeko beren ikastetxeetatik aldarazten dituzten irakasleek lanpostuak aukeratzeko ordena zehazterakoan, destinoko herria edo eskualdea izanen da kontuan, eta berdinketarik gertatzen bada, hurrengo irizpideak aplikatuko dira bata bestearen jarraian:
1.) Euskaraz irakasteko konpromisoaren antzinatasunik handiena.
2.) Beraiei dagokien kidegoan eman dituzten zerbitzuak. Abenduaren 30eko 31/1991 Legearen xedapen gehigarrietako 29.ari jarraikiz kidegoetan sartutako irakasleei lehenengo zerbitzu urtea kenduko zaie, praktikalditzat jotzen baita. Ondorio horietarako, 2009ko maiatzaren 1a arte emandako zerbitzuak kontatuko dira.
3.) Kidegoan zein urtetan sartu ziren, nor lehenago.
4.) Maisu-maistren Kidegoan sartzeko hautapen prozeduran erdietsiriko zerrenda-zenbaki baxuena edo kidegoan sartzeko hautapen prozeduran erdietsiriko puntuaziorik altuena.
Laugarrena. Behin-behineko destinoak eta praktikaldikoak esleitzea.
Behin-behineko destinoa duten irakasleek eta praktiketako funtzionarioek destino berria aukeratu beharko dute 2009-2010 ikasturterako, horretarako eginen den jendaurreko ekitaldi batean.
A.-Maisu-maistren kidegoko funtzionarioak.
1. Ondoan aipatzen diren maisu-maistrek aukeratu beharko dute behin-behineko destinoa:
a) 2009-2010 ikasturtean behin-behineko destinoa duten maisu-maistra guztiek eta praktikaldian gai kalifikazioa jaso dutenek, salbu eta Hezkuntza Departamentuko Giza Baliabideen Zerbitzuko zuzendariak abenduaren 4ko 3315/2007 Ebazpenaren bidez deitutako lekualdatze lehiaketan behin betiko destinoa lortu dutenak.
b) Behin betiko destinoa galtzea ekarri dien egoera administratibo batetik etorri eta berriz ere jardunean dauden kidego horietako maisu-maistrek.
c) Nafarroako Foru Komunitateko Administrazioaren zerbitzuko Maisu-maistren Kidegoan sartzeko deialdian, Giza Baliabideen Zerbitzuko zuzendariak urtarrilaren 2an emandako 1/2009 Ebazpenaren bidez onetsian, hautatutako praktikaldiko funtzionarioek.
2. Lehentasun ordena.
Maisu-maistrak Kidegoan duten antzinatasunaren arabera agertuko dira zerrendan, antzinatasun handienekoa lehenengoa dela. Horretarako, 2009ko maiatzaren 1a arte emandako zerbitzuak hartuko dira kontuan. Berdinketarik izanez gero, hautapen prozeduran zerrenda-zenbaki baxuena edo kidegoan sartzeko hautapen prozeduran puntuaziorik altuena lortu duen funtzionarioak izanen du lehentasuna.
Praktikak egiten ari diren funtzionarioek zerbitzuko beharren arabera hautatuko dute destinoa, hautapen prozedurako kidego, espezialitate eta hizkuntzako lanpostu hutsetan edo aldi baterako ordezkapenetan edo, kasua bada, dagokien hautapen prozesuan gainditu zuten hizkuntzako Lehen Hezkuntzako espezialitatean, hartan lortutako puntuazio osoa kontuan hartuta. Lanpostu hutsak aukeratzeko orduan, %33ko ezgaitasuna edo handiagoa duten izangaiek lehentasuna izanen dute gainerako izangaien aurretik.
Honako irizpide hauek hartuko dira kontuan praktikaldiko funtzionarioak hautatzerakoan:
1. Lanpostuak izangai hautatuak baino gehiago diren espezialitateetako praktiketan ari diren funtzionarioek hautatuko dute lehenik destinoa.
2. Horien ondoren, lanpostuak izangai hautatuak baino gutxiago diren espezialitateetako praktiketan ari diren funtzionarioek hautatuko dute destinoa. Kasu horretan, izangai hautatuen eta lanpostu hutsen arteko aldea zein espezialitatetan den handiagoa, espezialitate horretako funtzionarioek hautatuko dute lehenik. Izangai horiek aukeran izanen dute ondokoak hautatzea: beren espezialitate eta hizkuntzako lanpostu arruntak, beren espezialitate eta hizkuntzako lanpostu ibiltariak, profildun lanpostuak, bai eta antzeko espezialitateetako lanpostuak hautapen prozesuko hizkuntzan ere, edo beste hizkuntza batean, behar den hizkuntz gaitasuna badute. Espezialitate bakoitzeko izangaiei eskaintzen zaizkien beste espezialitate batzuetako lanpostuen kopurua hau izanen da: espezialitate bakoitzeko hautapen prozesua gainditu duten izangaien kopuruaren eta horietako bakoitzean dauden lanpostu hutsen arteko aldea, profileko lanpostuak eta ibiltariak kenduta.
B.-Bigarren Hezkuntzako Katedradun eta Irakasleen, Lanbide Heziketako Irakasle Teknikoen, Hizkuntza Eskola Ofizialetako Katedradun eta Irakasleen, Arte Plastikoetako eta Diseinuko Katedradun, Irakasle eta Tailer Maisuen eta Musikako eta Arte Eszenikoetako Katedradun eta Irakasleen Kidegoetako funtzionarioak.
1. Ondotik aipatzen diren kidegoetako funtzionarioek aukeratuko dituzte behin-behineko destinoak:
a) Bigarren Hezkuntzako irakasleen, Lanbide Heziketako irakasle teknikoen, Hizkuntza Eskola Ofizialetako irakasleen eta Arte Plastikoetako eta Diseinuko irakasleen eta tailer maisuen, Musikako eta Arte Eszenikoetako katedradun eta irakasleen kidegoetako funtzionarioek, 2009-2010 ikasturtean behin-behineko destinoa baldin badute, eta praktikaldian gai kalifikazioa jaso dutenek, Giza Baliabideen Zerbitzuko zuzendariak abenduaren 4ko 3316/2008 Ebazpenaren bidez deitutako lekualdatze lehiaketan behin betiko destinoa lortu dutenak izan ezik.
b) Behin betiko destinoa galtzea ekarri dien egoera administratibo batetik etorri eta berriz ere jardunean dauden kidego horietako funtzionarioek.
c) Nafarroako Foru Komunitateko Administrazioaren zerbitzuko Bigarren Hezkuntzako Irakasleen Kidegoan sartu eta bertara igotzeko eta Lanbide Heziketako Irakasle Teknikoen eta Hizkuntza Eskola Ofizialetako Irakasleen Kidegoetan sartzeko deialdian hautatutako praktikaldiko funtzionarioek, praktikak luzatuta baldin badituzte edo 2009-2010 ikasturtean errepikatu behar badituzte. Giza Baliabideen Zerbitzuko zuzendariak abenduaren 28an emandako 2752/2007 Ebazpenaren bidez onetsi zen deialdia.
2. Lehentasun ordena.
Funtzionarioak kidegoan duten antzinatasunaren arabera agertuko dira zerrendan, antzinatasun handienekoa lehenengoa dela. Horretarako, 2009ko maiatzaren 1a arte emandako zerbitzuak hartuko dira kontuan. Berdinketarik izanez gero, hautapen prozeduran puntuazio handiena duen funtzionarioak izanen du lehentasuna.
Kontuan hartuko dira, dagokion kasuan, titularrak diren funtzionarioen lehentasunezko eskubideak.
Behin-behineko destinoa duten funtzionarioek destinoa hautatu ondoren, praktikaldia luzatua duten funtzionarioek edo 2009-2010 ikasturtean praktikaldia luzatua edo errepikatu beharra dutenek destinoa hautatuko dute hautapen prozedurako puntuazio osoa kontuan hartuta, zerbitzuko beharren arabera, hautatuak izan zireneko espezialitate eta hizkuntzako lanpostu hutsetan edo ordezkapenetan, prozesu hori gainditu zuten hizkuntzan edo antzeko espezialitateetan.
Bosgarrena. Zerbitzu eginkizunetako destinoen esleipena.
1.-Eskatzaileek bete beharreko baldintzak.
Nafarroako Foru Komunitateko Administrazioaren eta haren erakunde autonomoen organoetako langileen arloko eskudantziak zehazten dituen otsailaren 21eko 30/2005 Foru Dekretuaren 1. artikuluan ezarritakoa eta ebazpen hau oinarri harturik, Hezkuntza Departamentuko Giza Baliabideen Zerbitzuak 2009-2010 ikasturterako zerbitzu eginkizunak ematen ahal dizkie irakaskuntza ez-unibertsitarioko irakasleen kidegoetako karrerako funtzionarioei, baldintza hauek betetzen badituzte:
-Nafarroako Gobernuko Hezkuntza Departamentuaren mendeko ikastetxe publiko ez-unibertsitarioren batean behin-behineko edo behin betiko destinoa izatea.
-Jarduera egoeran egotea eta 2009-2010 ikasturterako beste zerbitzu eginkizunik onarturik ez edukitzea.
Beste zerbitzu eginkizunik ematen bazaio, arau hauetan xedatutakoa izanen da kontuan.
2.-Zerbitzu eginkizunen arrazoiak.
Giza Baliabideen Zerbitzuak salbuespen gisa honako kasuotan bakarrik ematen ahalko ditu zerbitzu eginkizunetan aritzeko baimenak:
a) Antolamendu arrazoien ondoriozko zerbitzu eginkizunak, Hezkuntza Departamentuak proposatuak.
Zerbitzu eginkizun horiek Hezkuntza Departamentuko zerbitzuek proposamen arrazoitua egin ondoren baizik ez dira emanen, honako arrazoi hauengatik:
1. Zerbitzu eginkizunak, Hezkuntza Departamentuko programa jakin batean aholkulari edo parte-hartzaile izateko.
2. Zerbitzu eginkizunak, ikastetxe batean programa jakin batean irakasle gisa parte hartzeko.
2009ko martxoaren 31 baino lehen, zerbitzu eginkizunak zein programatarako eskatu diren, zerbitzu horietako arduradunek Giza Baliabideen Zerbitzuari bidali beharko diote proposatutako zerbitzu eginkizunen zerrenda bakar bat, eta hari erantsi zerbitzu eginkizun horiek beren gain hartzeko interesdunen adostasuna.
Atal honetan adierazitako epeaz kanpo proposatutako zerbitzu eginkizunak eta interesdunek zuzenean eskatutakoak besterik gabe ezetsiko dira.
b) Interesdunek berek eskatutako zerbitzu eginkizunak.
Organikoki eta funtzionalki Nafarroako Gobernuko Hezkuntza Departamentuaren mende dauden funtzionarioek honako arrazoi hauengatik bakarrik eska ditzakete zerbitzu eginkizunak:
1. Zerbitzu eginkizunak, toki entitate bateko kide izanik ikastetxe batean irakasle jarduteko.
2008-2009 ikasturtean toki korporazio bateko kide izateagatik zerbitzu eginkizunetan aritu diren irakasleek 2009-2010 ikasturtean egoera horretan segitzen badute, destinoko ikastetxean bertan zerbitzu eginkizunetan egonen dira, eman dezaketen espezialitate batean behar beste ordu egonez gero, non eta ez duten idatziz adierazten, 2009ko martxoaren 31 baino lehen, beste lanpostu bat hautatu nahi dutela.
Arrazoi hori dela medio ematen diren zerbitzu eginkizunak, ikastetxe jakin bati esleituko zaizkio, kontuan harturik toki korporazioa zein herriri dagokion eta eskatzailearen destinoko ikastetxeko herriraino zenbaterainoko distantzia dagoen.
2. Eskaera egin duen funtzionarioaren osasun egoera.
Osasun arrazoien ondoriozko zerbitzu eginkizunetarako baimena emateko laneko arriskuei aurrea hartzeko araudiari jarraituko zaio.
Zerbitzu eginkizunetarako baimen hori eskatzen duten funtzionarioek medikuaren agiri eguneratua erantsi beharko diote eskabideari, baimena zein egoeragatik eskatzen den azaltzeko. Medikuaren agiria gutun-azal itxian aurkeztuko da.
Gero, Hezkuntza Departamentuko Laneko Arriskuen Prebentziorako Ataleko fakultatiboek peritazioa egin eta txostena igorriko diote Ebaluazio Batzordeari, eskatu diren zerbitzu eginkizunei buruzko ebazpena eman dezan.
3. Aparteko gorabeherak.
Eskatzailearen ezkontidearen, aurrekoen edo ondorengoen eritasun larriagatik eta funtzionarioaren destinoko herrian eri hori behar bezala zaintzerik ez denean.
Gorabehera hori frogatzen duten egiaztagiri mediko gaurkotuak alde batera utzi gabe, eskatzaileak bi ziurtagiri ekarri beharko ditu: bata, zerbitzu eginkizunetarako baimena zein herritan eskatu, eria hartan bizi dela frogatzen duena, eta bestea, Oinarrizko Gizarte Zerbitzuek edo Osasun Etxeetako gizarte langileek emandakoa, eria eskatzaileak zaindu behar duela frogatzen duena.
Eskabidean alegatutako datuak faltsuak badira, eman den zerbitzu eginkizunetarako baimena deuseztatu eginen da, eska dakizkiokeen erantzukizunak galarazi gabe, hala behar denean.
Salbuespenezko gorabehera horiengatik zerbitzu eginkizunetarako destinoa ikasturte bakarrerako esleitzen ahal da.
3.-Osasun arrazoiengatik edo gorabehera bereziengatik zerbitzu eginkizunak ematen zaizkien funtzionarioek, espresuki deitutako egintza publikoan hautatuko dute destinoa. Kasu horietan, 5. atalean aurreikusitako ebaluazio batzordeak zilegi du beharkizunak ezartzea edo eskatzaileak lanpostuak esleitzeko egintza publikoan zein har ditzakeen erabakitzea.
4.-Interesdunek berek eskatutako zerbitzu eginkizunak.
Osasun arrazoien, gorabehera ezohikoen eta hautetsi karguaren ondoriozko zerbitzu eginkizunetarako eskabideak Giza Baliabideen Zerbitzuari zuzenduko zaizkio eta ondoko toki hauetakoren batean aurkeztu beharko dira: Hezkuntza Departamentuko Erregistroa (Santo Domingo, zk.g., Iruña), Nafarroako Gobernuko Erregistro Orokorra, Nafarroako Gobernuaren gainerako erregistro bulegotan (zerrenda 14. Nafarroako Aldizkari Ofizialean argitaratu zen, urtarrilaren 30ean), edo Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazitako bideren bat erabiliz, ebazpen honen I. eranskinean argitaratzen den ereduaren arabera, hamar egun baliodunekoa epean, jarraibide hauek Nafarroako Aldizkari Ofizialean argitaratu eta biharamunetik hasita.
Epez kanpo aurkeztutako eskabideak ez dira baloratuko.
Interesdunek beren eskaerari uko egiten ahalko diote eskabideak aurkezteko epean. Epe hori betetakoan, zerbitzu eginkizunetan beste lanpostu bat betetzeko hautatzen diren funtzionarioek epe horretatik kanpo egiten dituzten ukoak ere onartuko dira, baina ez bestelakorik.
5.-Ebaluazio Batzordea.
Zerbitzu eginkizunen eskaerak kide hauek osatuko duten batzordearen proposamena ikusi ondoren ebatziko dira :
Batzordeburua: Ikuskapenaren eta Zerbitzuen zuzendari nagusia.
Mahaikidea: Hezkuntzako ikuskatzaile bat.
Mahaikidea: Antolamenduaren, Kalitatearen eta Berrikuntzaren Zuzendaritza Nagusiari atxikitako funtzionario bat.
Kideak: Irakaskuntza ez-unibertsitarioko langileen batzorderako azken hauteskundeetan boto gehien lortu duten sindikatuetako hiru ordezkari.
Idazkaria: Giza Baliabideen Zerbitzuari atxikitako funtzionario bat.
Batzordeak aholkulari espezialistak ekartzea proposatzen ahalko du, beren eskumeneko arloen balorazioa egin dezaten, batez ere gorabehera berezien ondoriozko zerbitzu eginkizunak emateko. Giza Baliabideen Zerbitzuko zuzendariak izendatuko ditu aholkulari horiek.
Batzorde horrek hartutako erabakiak, eskatzen diren zerbitzu eginkizunen ingurukoak, jendaurrean jarriko dira Hezkuntza Departamentuko iragarki oholean (Santo Domingo kalea, zk.g., Iruña) eta Hezkuntza Departamentuaren web orrian: www.pnte.cfnavarra.es. Zerbitzu eginkizunen behin-behineko zerrendaren kontra interesdunek zilegi izanen dute, hiru eguneko epean, erreklamazioak aurkeztea eta eman zaizkien zerbitzu eginkizunei uko egitea. Erreklamazioak ebatzita, emandako zerbitzu eginkizunen behin betiko zerrenda argitaratuko da eta Giza Baliabideen Zerbitzura bidaliko, baimena eman dezan.
Seigarrena. Zerbitzu eginkizunen araubidea.
Ebazpen honen ondorioz, antolamendu arrazoiengatik proposatutako zerbitzu eginkizunak ez dira inola ere baimenduko funtzionario proposatuak behin betiko destinoa lortzen badu Hezkuntza Departamentuak 2008-2009 urtean deitutako lekualdatze lehiaketan.
Zerbitzu eginkizunak emateko ezinbestekoa izanen da ikastetxe horretan kasuan kasuko espezialitate eta hizkuntzako lanpostu hutsen bat izatea, 2009-2010 ikasturterako hezkuntza plangintzaren arabera aurreikusitako beharrak zein diren zehaztu eta gero.
Behin zerbitzu eginkizunen bat baimenduz gero, ez dago hari uko egiterik, eta funtzionarioa dagoen lanpostua 2009-2010 ikasturtean funtzionario edo aldi baterako lan-kontratudunek betetzeko eskainiko da.
Zazpigarrena. Esleitutako destinoak argitara ematea.
Ebazpen honetan aipatzen diren funtzionarioei esleitutako destinoak Nafarroako Aldizkari Ofizialean argitaratuko dira, Giza Baliabideen Zerbitzuko zuzendariaren ebazpen bidez, 2009-2010 ikasturterako destinoak esleitzeko jendaurreko ekitaldiak egin ondoren. Nafarroako Aldizkari Ofizialean argitaratuko den ebazpen horrek interesdunei banan-banan egin beharreko jakinarazpena ordeztuko du.
II.-Ikastetxeetako zuzendarien izendapen bereziaren proposamena.
2009ko maiatzaren 15a baino lehen, Hezkuntzako Ikuskapen Zerbitzuak Giza Baliabideen Zerbitzuari igorriko dio ikastetxeetako zuzendaritza-karguetarako ezohiko bidetik proposatutako funtzionarioen zerrenda, eta bertan adieraziko da proposatutako funtzionarioak lanpostua zein ikastetxetan duen eta zuzendaritza-kargu gisa zein ikastetxetarako proposatzen den.
Epe horretantxe, Hezkuntzako Ikuskapen Zerbitzuak Giza Baliabideen Zerbitzuari igorriko dio Hezkuntza Lege Organikoaren babesean deitutako merezimendu lehiaketen ondorioz zuzendaritza-taldekide gisa proposatutako funtzionarioen zerrenda.
Zuzendaritza-taldeen izendapena ikastetxeko zuzendaria izendatzen den epe bererako eginen da, eta betiere zuzendaritza-taldeko gainerako kideen izendapen hori eginkizuna bete behar duen eperako lanpostu hutsa egotearen baldintzapean izanen da, ikasturte bakoitzeko hezkuntza-plangintzaren arabera.
III.-2009-2010 ikasturterako lanaldi murrizketak eskatzeko prozedura.
Hezkuntza Departamentuaren zerbitzuko irakasle ez-unibertsitarioek lanaldiaren heren bat edo erdia murrizteko eskaera egiten ahalko dute, apirilaren 28ko 113/1997 Foru Dekretuan ageri diren kasuetakoren batean baldin badaude eta dekretu horretako baldintzak betetzen baldin badituzte.
Organikoki eta funtzionalki Hezkuntza Departamentuaren mende dauden irakasle funtzionario ez-unibertsitarioek, baldin eta lanaldi murrizketa eskatu nahi badute edo lehendik duten baimena 2009-2010 ikasturtera luzatu nahi badute, Giza Baliabideen Zerbitzuari jakinarazi behar diote 2009ko apirilaren 15a baino lehen.
Destinoa data horren ondotik aldatzen dutenek hiru egun balioduneko epea izanen dute, destinoa aldatu eta biharamunetik hasita, lanaldi murrizketa edo murrizketaren luzapena eskatzeko.
Halaber, lanaldi murrizketa edo murrizketaren luzapena eskatzen ahalko da hiru egun balioduneko epean, 2009-2010 ikasturterako destinoak esleitzeko jendaurreko ekitaldia egin eta biharamunetik hasita.
Lanaldi murrizketa edo murrizketaren luzapena eskatzeko, jarraibide hauen II. eranskineko ereduaren araberako eskabidea bete beharko da.
Interesdunek beren eskaerari uko egiten ahalko diote eskabideak aurkezteko epean.
Epe horretan eskatzen diren lanaldi murrizketak 2009ko irailaren 1etik 2010ko abuztuaren 31ra bitartekoak izanen dira, murrizketarako arrazoia epe laburragoan bukatzen ez bada behintzat.
Ezarritako epetik kanpo eskatzen diren lanaldi murrizketak, apirilaren 28ko 113/1997 Foru Dekretuko 1. artikuluan xedatutakoaren arabera, ez dira baliatzen hasiko harik eta lanaldi-murrizketaren baimena jakinarazten den eguna arte, zeina arauz ezarritako epean jakinaraziko baitzaie.
Aurreko atalean adierazitako lanaldi murrizketak 2009-2010 ikasturtea bukatu arte emanen dira beti, murrizketaren arrazoia epe laburragoan bukatzen ez bada behintzat.
2. Ebazpen hau eta eranskinak Nafarroako Aldizkari Ofizialean argitaratzea.
3. Ebazpen honen eta eranskinen aurka gora jotzeko errekurtsoa aurkezten ahal da, Lehendakaritza, Justizia eta Barne kontseilariari zuzendua, hilabeteko epean, argitaratu eta biharamunetik aurrera.
4. Ebazpen hau eta eranskinak igortzea Idazkaritza Tekniko Nagusira, Antolamenduaren, Kalitatearen eta Berrikuntzaren Zuzendaritza Nagusira, Lanbide Heziketaren eta Unibertsitateen Zuzendaritza Nagusira, Giza Baliabideen Zerbitzura eta Hezkuntza Ikuskapen eta Zerbitzuen Zuzendaritza Nagusiko Hezkuntza Ikuskapen Zerbitzura, behar diren ondorioak izan ditzaten.
I. ERANSKINA. 2009-2010 ikasturtean zerbitzu eginkizunetan aritzeko eskaera
Deiturak:
Izena: …………………………………….
NANa: .................................... LEZ: ……………………………………
Kidegoa: ............................. Espezialitatea: ……………………………
Hizkuntza modalitatea: ……………………….
Destinoa (adierazi behar dena): …………………………………
Behin-behinekoa [ ] Behin betikoa [ ].
Destinoko ikastetxea: ............................. Herria: ……………………………….
Eskatzen dut:
Zerbitzu eginkizunak, arrazoi honengatik: (bidezkoa dena adierazi)
[ ] Eskatzailearen osasun egoera.
[ ] Aparteko gorabeherak.
[ ] Udal korporazio bateko hautetsia
................. ..............(e)n, 2009ko ..........aren ....(e)an
(Sinadura, ezinbestekoa)
Giza Baliabideen Zerbitzuko zuzendaria.
II. ERANSKINA. Lanaldi murrizketarako eskaera
Funtzionarioaren datu pertsonalak.
Deiturak eta izena: .......................................... NANa: ………………….
Helbidea: Herria ...................................
Telefonoa: ................................ Posta kodea: ……………………..
Lanpostuaren datuak: ………………….
Lanpostua: ............................ Espezialitatea: ………………….
Irakasle kidegoa: ............................. Hizk. modalitatea: ……………………….
2009-2010 ikasturterako honako hau eskatzen du:
-Lanaldia murriztea:
[ ] 12 urtetik beherako haurraren legezko zaintzarako.
[ ] Legez onarturiko ezgaitasun fisiko, psikiko edo zentzumenekoa duen norbait zaintzeko.
[ ] Ezkontidearen edo bizikidearen, edo odol nahiz ezkontza bidezko lehen graduko ahaideen ezintasun kasuetan. Era berean, funtzionarioak adineko gaixo kroniko edo ezgai batekin bizi eta hura zaindu behar badu, odol edo ezkontza bidezko bigarren gradura arteko ahaidea bada.
[ ] 1/3 edo [ ] 1/2 (bidezkoa dena adierazi)
-Lanaldi-murriztea (Zerbitzu beharren araberakoa):
[ ] 12 urtetik 16 urtera bitarteko haurraren legezko zaintzarako.
[ ] 55 urteko edo hortik gorako langilea.
[ ] Lanerako aldi baterako ezintasuna edo iraunkorra sor ez dezakeen eritasuna duen langilea.
[ ] Langilearen interes partikularragatik, baimena emateak ez badu zailtasunik sortzen zerbitzuen funtzionamenduan.
[ ] 1/3 edo [ ] 1/2 (bidezkoa dena adierazi)
..............(e)n, 2009ko ..........aren ....(e)an
(Sinadura)
Giza Baliabideen Zerbitzuko zuzendaria.
Oharra: Eranskin honetan aipatzen diren lanaldi murrizketek ordainsariak eta kotizazio sozialak murriztea ekarriko dute, apirilaren 28ko 113/1997 Foru Dekretuan ezarritakoari jarraikiz.
