navarra.es
Castellano | Euskara | Français | English
Ezagutzera eman
435/2007 Ebazpena, martxoaren 19koa, Nafarroako Unibertsitate Publikoko errektoreak emana, Nafarroako Unibertsitate Publikoko irakasle-ikertzaileen lizentziei buruzko arautegia aldatzeko, Gobernu Kontseiluak 2007ko martxoaren 13an hartutako ...
435/2007 EBAZPENA, martxoaren 19koa, Nafarroako Unibertsitate Publikoko errektoreak emana, Nafarroako Unibertsitate Publikoko irakasle-ikertzaileen lizentziei buruzko arautegia aldatzeko, Gobernu Kontseiluak 2007ko martxoaren 13an hartutako erabakia argitara dadin agintzen duena
(2007ko 57. NAOn argitaratutako testua, maiatzaren 7an)
Atarikoa
Maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agintzen dut argitara dadila 2007ko martxoaren 13an Gobernu Kontseiluak onetsi zuen erabakia, Nafarroako Unibertsitate Publikoko irakasle-ikertzaileen lizentziei buruzko arautegiaren aldaketari buruzkoa.
NAFARROAKO UNIBERTSITATE PUBLIKOKO IRAKASLE-IKERTZAILEEN LIZENTZIEI BURUZKO ARAUTEGIA
1. artikulua
1.-Apirilaren 30eko 898/1985 Errege Dekretuaren 8. artikuluak eta Unibertsitatearen Estatutuen 89. artikuluak aipatzen dituzten irakasteko eta ikertzeko lizentziak arduraldi osoan lanean ari diren irakasleei eman ahal izango zaizkie, eta, halaber, Ramón y Cajal eta Juan de programen babesean kontratatutako arduraldi osoko ikertzaileei, betiere bosgarren artikuluan ezarritakoa galarazi gabe.
2.-Arautegi honen gaia diren lizentziak eman ahal izateko eskakizuna izango da Sailaren aldeko txostena edukitzea, eta horretan jasota egotea Sailak guztiz ziurtatzen duela eskatzaileak ematen duen irakaskuntza, eta inola ere ez dela justifikatuko irakasle iraunkorren plantilla handitzea, izaera horretako lizentziez gozatzeagatik.
2. artikulua
1.-. Eskatzaileari dagokion Saileko zuzendariak eskumena edukiko du irakaskuntzako eta ikerketako lizentziak emateko, horiek bi asterako edo denbora gutxiagorako direnean.
2.-Lizentzia zein egunetan hasiko den, gutxienez ere, egun hori baino zazpi egun baliodun lehenago aurkeztu beharko da eskaera, behar bezala frogatutako ohiz kanpoko zergatikoak ez badira. Saileko zuzendariak hiru egun baliodunetan ebatzi beharko du lizentzia emateari buruz, eta epe hori iragan ondoren, ebazpenik eman ez badu, eskaera onartu duela ulertuko da. Eskaeraren ebazpenaren berri Giza Baliabideen Zerbitzuari emango zaio. Eskaera ez onartzeari buruzko ebazpenaren aurka Estatutuetako 144.2 artikuluak aurreikusitako helegitea aurkeztu ahal izango da.
3. artikulua
1.-Irakasleen Gaietarako errektoreordeak ebatziko ditu bi astekoak edo gehiagokoak, eta hiru hilabete baino gutxiagokoak diren irakasteko eta ikertzeko lizentzien eskaerak, bai eta saileko zuzendariek eskatutakoak ere, epe laburragokoak badira ere.
Lizentzia eskaera Giza Baliabidetarako Zerbitzuan aurkeztu beharko da, lizentzia zein egunetan hasiko den, egun hori baino hamabost egun baliodun lehenago, gutxienez ere. Irakaslearen eskaera eredu normalduan aurkeztuko da, eta horrekin batera, saileko zuzendariek bi aste baino gutxiagoko lizentzietarako egiten duten eskaeren kasuan izan ezik, idazki bat aurkeztuko da baimenaren egokitasuna arrazoitzeko, kanpoan egon beharreko epe zehatza jakinarazteko, eta epe horretan irakasleak egin beharrekoak azaltzeko. Horretaz gainera, ikastegi hartzaileak emandako egonaldirako onarpen gutuna aurkeztuko da edo, bestela, burutu beharreko jarduera onartu dela frogatzen duen dokumentua. Halaber, Saileko Kontseiluaren aldeko txostena ere erantsiko zaio.
2.-Irakasleen Gaietarako errektoreordeak, eskaera aurkezten denetik aurrera, bost egun baliodunen epean eman beharko du ebazpena lizentzia emateari buruz. Eskatutako dokumentazioa aurkeztu ez bada, ebazpena emateko epea geldiaraziko da. Ebazpenik eta jakinarazpenik eman gabe iraungitzen bada epea, eskaera ez onartutzat emango da. Eskaera ez onartzeari buruzko ebazpenaren aurka interesdunak Estatutuetako 144.2 artikuluak aurreikusitako helegitea aurkeztu ahal izango du.
4. artikulua
1.-Hiru hilabetekoak edo epe luzeagokoak diren irakasteko eta ikertzeko lizentziak Gobernu Kontseiluak ebatziko ditu, prozedura honen arabera:
1) Eskaerak Giza Baliabideen Zerbitzuan aurkeztu beharko dira, inprimaki normalduan, eta egonaldia hasteko eguna noizko aurreikusten den, egun hori baino bi hilabete lehenago, gutxienez ere.
2) Eskaerarekin batera idazki bat aurkeztuko da arrazoiak emateko egonaldiaren helburuari buruz eta baimenaren egokitasunari buruz, kanpoan egon beharreko epe zehatza jakinarazteko, eta epe horretan irakasleak egin beharrekoak azaltzeko, eta, gainera, ikastegi hartzaileak emandako egonaldirako onarpen gutuna.
3) Horrez gainera, eskatzaileari dagokion saileko Kontseiluak emandako aldeko txostena gehituko zaio, eta horretan eskatzailearen irakaslana betetzeko ardura duten irakaslea edo irakasleak azalduko dira, hori bete behar bada. Egonaldia egin behar bada eskatzaileak irakaslana duen aldi batean, irakaslan hori osoa eskatzailea ordezteko izendatutakoak edo izendatutakoek bakarrik egin beharko dute.
4) Irakasleen Gaietarako errektoreordeak egiaztatuko du eskaerak betetzen ote dituen indardun arauetan eskatutakoak, eta betetzen baditu, eskaera idazkari nagusiari bidaliko dio dokumentazio guztiarekin batera.
5) Gobernu Kontseiluak hartutako erabakiaren berri eskatzaileari, Irakasleen Gaietarako errektoreordeari, Saileko zuzendariari eta Nominak eta Gizarte Segurantza bulegoari emango zaie.
6) Lizentzia eman, eta eskatzaileak uko egiten badio, Irakasleen Gaietarako errektoreordeari jakinaraziko dio hori, eta azalduko zergatik egin dion uko.
7) Lizentzia-aldia bukatu eta hurrengo hilabetean zehar, Irakasleen Gaietarako errektoreordetzan oroitidazki bat aurkeztuko da burututako jarduerari buruz, eta egonaldia zein ikastegitan egin den, ikastegi horren ziurtagiriaren kopia.
2.-Eskatzailea lagun bakarreko gobernu-erakundea bada, indardun arauek ordezkapenari buruz jasotzen dituzten xedapenak aplikatuko dira, alde batera utzirik proposamen libreko erakundeak, horietan espreski izendatu behar baita lizentziaren aldian karguan egongo den pertsona.
3.-Artikulu honetan aurreikusitako lizentziak ez dira bederatzi hilabetekoak baino luzeagoak izango, alde batera utzirik Laguntzaileek Estatutuen 89.2 artikulua aplikatuz eskatutakoak.
4. Arautegi honen 8. artikuluan ezarritakoa izango da lansarien araubidea.
5. artikulua
1.-Arduraldi ez-osoan aritzen diren irakasleek eskolak emateko aldian bakarrik eskatu ahal izango dituzte irakatsi eta ikertzeko lizentziak, bi astekoak edo epe motzagokoak direnean.
2.-Arduraldi ez-osoan aritzen diren irakasleek aurreko puntuan aurreikusitako aldietarako eskatu ahal izango dituzte lizentziak, hiru hilabete baino epe motzagokoak direnean.
3.-Nolanahi ere, bermatuta egongo da irakaskuntza, azterketak egingo direla eta ikasleek tutoretzetako arreta izango dutela.
4.-Lizentzia horiek emateko eskumenen banaketa, eta aurkeztu beharreko dokumentazioa 2, 3 eta 4. artikuluetan adierazitakoa izango da.
6. artikulua
1.-Hala eskatzen duten irakasle laguntzaileek, nazioko edo atzerriko beste unibertsitate edo zientzia erakunde batzuetan, ikasketak egiteko lizentziak eduki ahal izango dituzte, gehienez ere, bi urteko eperako, betiere, kontratudun izaerari eutsiz, eta beren lansari osoak jasoz.
2.-Lizentzia horiek emateko eskumenen banaketa, eta aurkeztu beharreko dokumentazioa 2, 3 eta 4. artikuluetan adierazitakoa izango da.
3.-Lehenengo idatz-zatian aipatutako epea gainditzen duten hurrenez hurreneko lizentziek 2, 3, 4 eta 8. artikuluetan azaldutako tratamendu bera izango dute.
6.bis. artikulua
1.-Hala eskatzen duten irakasle laguntzaile doktoreek, nazioko edo atzerriko beste unibertsitate edo zientzia erakunde batzuetan, ikasketak egiteko lizentziak eduki ahal izango dituzte, gehienez ere, urte bateko eperako, betiere, kontratudun izaerari eutsiz, eta beren lansari osoak jasoz.
2.-Lizentzia horiek emateko eskumenen banaketa, eta aurkeztu beharreko dokumentazioa 2, 3 eta 4. artikuluetan adierazitakoa izango da.
3.-Lehenengo idatz-zatian aipatutako epea gainditzen duten hurrenez hurreneko lizentziek 2, 3, 4 eta 8. artikuluetan azaldutako tratamendu bera izango dute.
7. artikulua
Lizentziak emateko ebazpenean edo erabakian zehaztasunez finkatuko dira egin beharreko lanaren iraupena, jaso beharreko lansariak eta lizentzia edukitzearen gainerako baldintzak.
8. artikulua
1.-Lizentzia hiru hilabetekoa baino epe motzagokoa bada, irakasleek ordura arte jasotzen zituzten lansari osoak irabazteko eskubidea izango dute.
2.-Emandako lizentzia baldin bada hiru hilabetekoa edo luzeagokoa, eta urtebetekoa edo hori baino epe motzagokoa, irakasleak ordura arte jasotzen zituen lansarien % 80 irabazteko eskubidea izango du, epe horretan zehar.
3.-Urtebete baino epe luzeagoko lizentziek edo geroagokoek, aurrekoei gehitu eta epe hori gainditzen badute, azkeneko bost urteotan, ez dute eskubiderik emango inolako lansaririk jasotzeko. Azken kontu horretan ez dira kontuan hartuko bi hilabete baino luzeagoko lizentziak.
4.-Elkarren segidan eman daitezkeen luzapenak, lizentziaren hiru lehenengo hilabeteak bete ondoren, irakasleak lehendik jasotzen ari zen lansarien % 80 ordainduko dira. Horretarako, luzapen moduan kontatuko dira irakaskuntza edo ikerketarako ikastegi berean lan egiteko lizentzia-aldiak, ikasturte berean egiten badira.
9. artikulua
1.-Sei urteetan etengabeko arduraldia eta lanaldi osoa izan dituzten irakasle iraunkorrek Estatutuen 90. artikuluko urteko lizentzia eskatu ahal izango dute, ikerketa eta hobekuntza lanak egiteko, eskakizun hauek betetzen badituzte:
a) Eskabidea eskatu aurreko sei urteetan, gutxienez ere, zerbitzu aktiboan aritu izatea etengabe eta arduraldi osoan, Nafarroako Unibertsitate Publikoan.
b) Irakaskuntza eta ikerketa hobetzeko jardueren programa aurkeztea.
c) Azkeneko sei urteotan urteko lizentziarik ez edukitzea, edo sei hilabete baino luzeagokoa, azkeneko hiru urteotan, eta hori eskabideak aurkezteko epea bukatzen den egunean betetzea.
2.-Interesa duten irakasleek giza Baliabideen Zerbitzuan aurkeztuko dute eskabidea, Gobernu Kontseiluko buruari zuzendua, eta aurreko ikasturteko martxoaren 1a baino lehenago egingo dute, eskakizunak frogaturik dauzkatela. Eskabide horiek ekaina bukatu aurretik balioetsi eta ebatziko dira. Epe hori iraungi, eta ebatzi eta jakinarazi gabe baldin badaude, eskaera onartu dela ulertuko da.
3.-Urteko lizentziarako eskaeraren berri Saileko Kontseiluak emango du, irakaskuntza antolaketarako dagokion plana ezartzeko, eta irakaskuntza normaltasunez gara dadin bermatzeko eta beharrezko ordezkapenak egiteko neurriak hartzeko.
4.-Gobernu Kontseiluak lizentzia eman ondoren, irakaslea salbuetsita geldituko da irakasteko betebeharretatik, eta, epe horretan, lehendik jasotzen ari zen lansarien % 80 jasoko du.
5.-Gobernu erakunde lagun bakarrekoetan aritzea bateraezina da urteko lizentzia edukitzearekin.
6.-Urteko lizentzia-aldia bukatzean, irakasleak sailean eta Irakasleen Gaietarako Errektoreordetzan txosten bat aurkeztuko du burututako jardueraren emaitzaren berri emateko. Txosten hori jendaurrekoa izango da.
10. artikulua
Unibertsitateak bere aurrekontuetan kontusail bat bideratuko du xedapen honetan jasotako urteko lizentziak eman ahal izateko.
Xedapen Indargabetzaile Bakarra
Indarrik gabe gelditu dira erabaki honetan ezarritakoari aurka egiten dioten xedapen guztiak".
