navarra.es
Castellano | Euskara | Français | English
Ezagutzera eman
Foru Agindua, 1994.eko abenduaren 19koa, Nekazaritza, Abeltzaintza eta Mendi Kontseilariak emana, maiatzaren 23ko 103/1994 Foru Dekretua garatzeko, Nekazaritzako Elikagaien Artisau Diploma eman eta Nekazaritzako Elikagaien Artisautzako Enpresen...
FORU AGINDUA, 1994.eko abenduaren 19koa, Nekazaritza, Abeltzaintza eta Mendi Kontseilariak emana, maiatzaren 23ko 103/1994 Foru Dekretua garatzeko, Nekazaritzako Elikagaien Artisau Diploma eman eta Nekazaritzako Elikagaien Artisautzako Enpresen Erregistroan inskribatzeko arauak finkatzen dituena
(Testu bateratua. Jatorrizkoa 1995eko 2. NAOn argitaratua, urtarrilaren 4an. Aldaketak: Foru Agindua, 2001eko abenduaren 4koa)
Atarikoa
Maiatzaren 23ko 103/1994 Foru Dekretuak, nekazaritzako elikagaien Nafarroako artisautza arautzen duenak, 3. artikuluan zehazten du zer den nekazaritzako elikagaien artisaua eta Nekazaritza, Abeltzaintza eta Mendi Departamentua dela Diploma emanen diona erabakitzen du.
Dekretu berean, 5. artikuluaren bidez ematen zaio sorrera Nekazaritzako Elikagaien Artisautzako Enpresen Erregistroari, Nekazaritza, Abeltzaintza eta Mendi Departamentuari atxikirik.
Bestalde, Foru Dekretu horretako azken xedapenetako lehenak ahalmena ematen dio Nekazaritza, Abeltzaintza eta Mendi Kontseilariari hura garatu eta betetzeko behar diren xedapen guztiak eman ditzan.
Hori eta, xedatu dut:
1. artikulua
Foru Agindu honen xedea Nekazaritzako Elikagaien Artisau Diploma eman eta Nekazaritzako Elikagaien Artisautzako Enpresen Erregistroan inskribatzeko arauak finkatzea da, maiatzaren 23ko 103/1994 Foru Dekretua garatzearren.
2. artikulua
Nekazaritza, Abeltzaintza eta Mendi Departamentura igorritako eskabidez eginen da Nekazaritzako Elikagaien Artisau Diploma eskuratzeko eskaera, Agindu honen 1. Eraskinean heldu den ereduari jarraituz.
3. artikulua
Nekazaritza, Abeltzaintza eta Mendi Departamentuak emanen du Nekazaritzako Elikagaien Artisau Diploma, eta baldintza hauek betetzen dituzten eskatzaileei emanen zaie:
-Gutxienez hiru urteko esperientzia frogatzea Nekazaritzako Elikagaien Artisautza Lanbideen Zerrendako Lanbide batean edo urtebetekoa, behar adinako prestakuntza frogatzen badu.
-Norberak zuzenean parte hartzea lanetan.
-Elikagaiak erabiltzeko karneta izatea.
Gainera, Nekazaritzako Elikagaien Artisautza Batzordeak haren alde emandako txostena beharko du.
4. artikulua
Ohizko helegitea jarri ahalko da Nafarroako Gobernuan Nekazaritzako Elikagaien Artisau Diploma ukatzearen aurka, ukoa jakinarazi eta hilabeteko epean.
5. artikulua
1. Nekazaritza, Abeltzaintza eta Mendi Departamentura igorritako eskabidez eginen da Nekazaritzako Elikagaien Artisautza Enpresen Erregistroan kalifikatu eta inskribatzeko eskaera, Agindu honen II. Eraskinean heldu den ereduari jarraituz.
2. Eskabideari, enpresa batena bada, dokumentazio hau erantsiko zaio:
-Agiri bat, enpresa horrek Artisau Diplomaren jabe den nekazaritzako elikagaien artisauaren erantzukizuna eta zuzendaritza bere gain hartzen duela frogatzeko. Enpresak prestatoki bat baino gehiago badu, bakoitzean artisau arduradun batek egon beharko du.
-Lizentzia fiskala lortua izatearen frogagiria.
-Azalpen txosten bat, produktu bakoitza prestatzeko prozedura, ekoizpen ahalmena, langile kopurua eta arautegi tekniko sanitarioa betetzen dela agertuko duena. Txosten horri instalazioen krokis akotatua edo proiektua gehituko zaio.
3. Enpresa batek, artisautzakoa izateko eta erregistroan inskribatzeko, aplikatzekoak diren Nekazaritzako Elikagai Artisautzakoen Arauekin bat, ekoizpenaren 100eko 50 baino gehiago eskuz landua izan beharko du.
4. Elkarteak inskribatzeko, kide guztiak Nekazaritzako Elikagaien Artisautzako Enpresen Erregistroan inskribatuak egon daitezen eskatuko da. Elkarteek estatutuen kopia erantsiko diote eskaerari.
6. artikulua
Nekazaritza, Abeltzaintza eta Mendi Departamentuak eginen du kalifikazioa, eta horren ondorioz, Erregistroko inskribapena, aldez aurretik Nekazaritzako Elikagaien Artisautza Batzordeak haren alde emandako txostena izanik.
7. artikulua
Departamentuak kalifikazioa kendu ahalko du, maiatzaren 23ko 103/1994 Foru Dekretuaren 6.3 artikuluan zehaztutako kasurik gertatzen dela frogatuz gero.
8. artikulua
Bi urtetik behin berritu beharko da kalifikazioa, eta beraz, Erregistro inskribapena ere, Nekazaritza, Abeltzaintza eta Mendi Departamentuari eskaera eginez. Horri, maiatzaren 23ko 103/1994 Foru Dekretuan eta Foru Agindu honetan ezarritako baldintzak betetzen segitzen direla forgatzen duen dokumentazioa erantsiko zaio.
9. artikulua
Arrazoiak eman beharko dira beti eta ohizko helegitea jarri ahalko da Nafarroako Gobernuan, jakinarazpenetik hilabeteko epean, honako hauen aurka:
-Nekazaritzako Elikagaien Artisautza Diploma ukatzea.
-Nekazaritzako Elikagaien Artisautzako Enpresaren kalifikazioa ukatzea.
-Nekazaritzako Elikagaien Artisautzako Enpresaren kalifikazioa kendu eta, beraz, Erregistroan baja izatea.
Azken Xedapen Bakarra
Foru Agindu honek Nafarroako Aldizkari Ofizialean argitaratu eta biharamunean hartuko du indarra.
I. ERASKINA
************* imagen ****************
II. ERASKINA
************* imagen ****************
