navarra.es
Castellano | Euskara | Français | English
Ezagutzera eman
2622/2008 Ebazpena, irailaren 24koa, Hezkuntza Departamentuko Giza Baliabideen Zerbitzuko zuzendariak emana, Nafarroako Foru Komunitateko Administrazioaren zerbitzuko Bigarren Hezkuntzako Irakasleen, Lanbide Heziketako Irakasle Teknikoen ...
2622/2008 EBAZPENA, irailaren 24koa, Hezkuntza Departamentuko Giza Baliabideen Zerbitzuko zuzendariak emana, Nafarroako Foru Komunitateko Administrazioaren zerbitzuko Bigarren Hezkuntzako Irakasleen, Lanbide Heziketako Irakasle Teknikoen eta Hizkuntza Eskola Ofizialetako Irakasleen Kidegoetan sartzeko deialdiko praktikaldiari dagozkion txostenak, ikasgelan egindako lanari buruzkoa eta irakaslanari buruzkoa, onesten dituena
(2008ko 130. NAOn argitaratutako testua, urriaren 24an)
Atarikoa
Hezkuntza Departamentuko Giza Baliabideen Zerbitzuko zuzendariak abenduaren 28an emandako 2752/2007 Ebazpenaren bitartez, Nafarroako Foru Komunitateko Administrazioaren zerbitzuko Bigarren Hezkuntzako Irakasleen Kidegoan eta Lanbide Heziketako Irakasle Teknikoen eta Hizkuntza Eskola Ofizialetako Irakasleen Kidegoetan sartzeko oposizio-lehiaketaren deialdia onetsi zen (2008ko 13. Nafarroako Aldizkari Ofiziala, urtarrilaren 28koa).
Hezkuntza Departamentuko Giza Baliabideen Zerbitzuko zuzendariak abuztuaren 14an emandako 2056/2008 Ebazpenaren bitartez, Nafarroako Foru Komunitateko Administrazioaren zerbitzuko Lanbide Heziketako Irakasle Teknikoen eta Hizkuntza Eskola Ofizialetako Irakasleen Kidegoetan sartzeko deialdiko praktikaldia arautu zen (2008ko 107. Nafarroako Aldizkari Ofiziala, irailaren 1ekoa).
Ebazpen horren bosgarren oinarriak ezartzen du Batzorde Kalifikatzaileak eginen duela izangaien ebaluazioa:
a) Praktiketako funtzionarioak ikasgelan egindako lanari buruzko txostenak, irakasle tutoreak, departamentuko buruak eta ikastetxeko zuzendariak, bai eta bertako ikuskatzaileak ere, dagokionean, bakoitzak bere aldetik egin beharrekoak.
b) Irakaslanari buruzko txostenak, irakasle tutoreak, departamentuko buruak eta ikastetxeko zuzendariak, bai eta bertako ikuskatzaileak ere, dagokionean, bakoitzak bere aldetik egin beharrekoak.
Beraz, deialdiaren oinarri horrekin bat, bidezkoa da ereduak onestea irakasle tutoreak, departamentuko buruak eta ikastetxeko zuzendariak, bakoitzak bere aldetik, praktiketako funtzionarioak ikasgelan egindako lanari eta irakaslanari buruz egin beharreko txostenetarako.
Horrenbestez, Hezkuntza Departamentuko Ikuskapenaren eta Zerbitzuen zuzendari nagusiak irailaren 19an eman 155/2007 Ebazpenak eskuordetutako eskurantzak erabiliz, ebatzi dut:
Lehena
Nafarroako Foru Komunitateko Administrazioaren zerbitzuko Bigarren Hezkuntzako Irakasleen, Lanbide Heziketako Irakasle Teknikoen eta Hizkuntza Eskola Ofizialetako Irakasleen Kidegoetan sartzeko deialdiko praktiken faseari dagozkion txostenak, ikasgelan egindako lanari buruzkoa eta irakaslanari buruzkoa, onestea, eranskin hauei jarraikiz:
-I. eranskina: ikasgelan egindako lanari eta klasearen garapenari buruzko txostenaren eredua.
-II. eranskina: irakaslanari buruzko txostenaren eredua.
Bigarrena
Ebazpen hau eta eranskinak Nafarroako Aldizkari Ofizialean argitaratzea.
Hirugarrena
Ebazpen honen kontra gora jotzeko errekurtsoa jar daiteke, Lehendakaritza, Justizia eta Barne kontseilariari zuzendua, hilabeteko epean, Nafarroako Aldizkari Ofizialean argitaratu eta biharamunetik aurrera.
Laugarrena
Ebazpen hau eta eranskinak Idazkaritza Tekniko Nagusira, Giza Baliabideen Zerbitzura, Hezkuntzako Ikuskapen Zerbitzura eta batzorde kalifikatzailearen kideei igortzea, behar diren ondorioak izan ditzaten.
I. ERANSKINA. Ikasgelan egindako lanari eta klasearen garapenari buruzko txostena
Sarrerako oharra: txostenen ereduak Hezkuntza Departamentuaren web orrialdean egonen dira: www.pnte.cfnavarra.es.
A) Psikologia eta pedagogiako irakasleak baloratzeko alderdiak
Psikologia eta Pedagogia espezialitateko irakasleendako txostena ikastetxean eginiko lanari dagokio, ez ikasgelan eginikoari
Praktiketako funtzionarioa:
Ikastetxea:
Adierazleak.
1.-Irakaslana koordinatzeko organoekin eta kide anitzeko organoekin lan egitea zerbitzuak ematen dituen ikastetxeko edo ikastetxeetako curriculum eta hezkuntza proiektuak egin, berrikusi eta gauzatzeko.
Puntuazioa - Maila [ ]
2.-Irakaslana koordinatzeko organoekin eta kide anitzeko organoekin lan egitea zerbitzuak ematen dituen ikastetxeko edo ikastetxeetako bizikidetza plana eta prestakuntza plana egiteko.
Puntuazioa - Maila [ ]
3.-Zerbitzuak ematen dituen ikastetxeko edo ikastetxeetako guraso eta ikasleentzako arreta, batez ere alderdi akademiko eta profesionalen arloko argibideak eta aholkuak ematen.
Puntuazioa - Maila [ ]
4.-Ikasleen balorazioa, oro har, egitea, bai eta premia duten ikasleen ebaluazio psikopedagogikoa ere, eta, bereziki, hezkuntza premia bereziak dituztenena.
Puntuazioa - Maila [ ]
5.-Prebentzio planen diseinuan lagundu eta parte hartzea, arazoak atzeman, soluzioak bilatu eta arazoak saihesteko ahal den neurrian, funtzio hori betetzen eta hobetzen lagundu dezaketen inguruko beste batzuekin batera lan eginez, bereziki familiarekin.
Puntuazioa - Maila [ ]
6.-Tutore-lanerako plana egin, berrikusi eta gauzatzen parte hartzea, zerbitzuak ematen dituen ikastetxeko edo ikastetxeetako HLUaren barruan.
Puntuazioa - Maila [ ]
7.-Aholkularitza psikopedagogikoa ziklo eta/edo departamentu didaktikoei programazio didaktikoak eta UPOa egiteko.
Puntuazioa - Maila [ ]
8.-Aniztasunari erantzuteko plana prestatzen laguntzea.
Puntuazioa - Maila [ ]
B) Gainerako espezialitateetako praktiketako funtzionarioak ikasgelan egindako lanaren behaketari buruz zuzendariak, departamentuko buruak eta irakasle tutoreak egin beharreko txostenerako adierazleak
Praktiketako funtzionarioa:
Ikastetxea:
Adierazleak.
1.-Edukiak ikasleen adinera egokitzea, zorroztasun kontzeptuala galdu gabe.
Puntuazioa - Maila [ ]
1. maila.-Akats kontzeptual edo/eta tekniko batzuk ikusi dira bere azalpen eta argibideetan. Oso hizkera jasoa erabiltzen du eta ikasleek ez diote ez ulertzen ez jarraitzen. Argi ikusten da arloko irakasgaia, modulua edo/eta didaktika gutxi menperatzen duela. Ez da seguru sentitzen eta azalpen nahiz argibideak ematean testuliburutik ez aldentzen saiatzen da. Azalpenak ez ditu argi eta koherentziaz ematen. Ikaskuntza mekanikoak sorrarazten ditu, esanguratsuak baino gehiago. Landutakoa ez du laburbiltzen ikasleei ulertzen laguntzeko eta ikasitakoan hutsunerik ez izateko. Unitate didaktikoa hastean, ez du kontuan hartzen ikasleek aldez aurretik zer dakiten.
2. maila.-Ikasleek ongi ulertzeko moduan ematen ditu azalpenak, terminologia egokia erabiliz. Hiztegi arrunta eta unitate didaktikoko terminologia batera erabiltzen ditu. Landutako eduki edo alderdiak egoki ulertzen dira. Ikasleek nabarmen bereganatzen dute ikasitakoa.
3. maila.-Irakasleak unitate didaktikoko edukiak eta/edo teknikak oso ongi menperatzen dituela ikusten da; kontzeptu bat ikuspegi desberdinetatik eta zehaztasun eta abstrakzio maila desberdinen bidez azaltzen du. Ezin hobeki egokitzen da ikasleen pentsamoldera eta horiek nabarmen ikasten dute.
2.-Ikasleak motibatzeko eta beren interesa pizteko gaitasuna.
Puntuazioa - Maila [ ]
1. maila.-Ikasle gehienek ez dute "bat egiten" irakaslearekin. Jokaera pasiboa dute. Eskoletan "gogoa beste nonbait dutela" ematen du. Irakasleak ez ditu adibideak eta beste estrategia didaktiko batzuk erabiltzen gaiarekiko interesa pizteko, arreta mantentzeko eta lan giroa izaten laguntzeko. Irakasleak tarteka alde egiten du ikasgelatik, inolako justifikaziorik gabe.
2. maila.-Ikasle gehienek klasea segitzen dute, nolabaiteko interesarekin. Batzuek interes handia erakusten dute. Baliteke talde txiki bat motibaziorik gabe egotea eta eskolaz "paso egitea", baina ez dira oztopo klasean. Ez dago inolako diziplina gabeziarik edo desordenik.
3. maila.-Ikasle gehienek irakaslearekin bereziki "bat egiten" dute. Egiten diren lanetan parte hartu eta motibazioz jokatzen dute. Lan giro ona ikusten da. Irakasleak ikaslea bideratu egiten du, akatsak zuzentzen dizkio eta asmatzen duenean adore ematen dio. Gainera, unitate didaktiko edo klaseko saio bakoitza hastean, sarrera edo motibaziorako jarduerak egiten ditu.
3.-Ikasgelan lan giro ona sortzeko gaitasuna eta eskolako diziplina menperatzea.
Puntuazioa - Maila [ ]
1. maila.-Ez dago lan giro normalik klasean. Irakasleak ez du klasea "menderatzen". Desordena dago, beharrezkoa den isiltasuna falta da eta ez dago diziplinarik. Irakasleak denborarik gehiena ohartarazten eta ordena jartzeko ahaleginean pasatzen du. Azaldutakoa maiz errepikatu behar izaten du. Disrupzio maila handia da eta tentsioa dago ikasgelan.
2. maila.-Lan giro normala dago klasean, berotasun handirik ez, baina "utzikeriarik" ere ez. Ez dago diziplina arazorik. Alde horretatik, giroa lasaia eta tentsiorik gabea da. Klaseko disrupzio kasu batzuk izan daitezke, baina irakasleak badaki horiek menderatzen eta ohiko egoerara itzularazten.
3. maila.-Oso lan giro ona dago. Berez ezartzen da diziplina. Ez dago inolako tentsiorik eta ikasleek beren lanean jartzen dute arreta. Irakaslearen agintea irakasle gisa duen ospearen ondorio da.
4.-Argitasuna eta koherentzia azalpenetan. Zalantzak argitzea.
Puntuazioa - Maila [ ]
1. maila.-Azalpenak nahasiak dira, ordenarik gabeak, ikasleek ulertzeko zailak, ez baita kontuan hartzen ez haien adin kronologikoa ez adimen adina. Deseroso sentitzen da ikasleek ez diotela ulertzen konturatzen denean. Esandakoa hitz berekin edo antzekoekin errepikatzeko joera du (batzuetan ozenago hitz eginez). Agertzen diren zalantzak argitzeko, testuliburua begiratzeko esaten die ikasleei, besterik gabe. Klasearen erdiak edo gutxiagok segi ditzake bere azalpenak.
2. maila.-Irakasleak nahiko argi azaltzen du unitate didaktikoaren edukia, zeinak zikloko programazioarekin koherentea izan behar baitu, eta kontzeptu zailak ikasleei ulerterraz egiten dizkie. Ikasleen %60 edo %70ak, gutxi gorabehera, lehenengo aldian ulertzen ditu azalpenak. Berriz azaldu eta gero, portzentajea %80ra edo gehiagora igotzen da.
3. maila.-Irakasleak azalpenak ematen dituen moduan, ikasle desmotibatuenek edo adimenez beste batzuk baino urriago direnek maila zehatz batean ulertzea lortzen dute. Adibideak, analogiak eta eguneroko bizitzako egoerak edo sektore profesionalekoak erabiltzen ditu azalpenetan laguntzeko (baina pasadizoz betetako klasea izan gabe). Funtsezko puntuak eta zailtasun handienekoak errepikatu egiten ditu eta gehiago nabarmentzen, hitz eta ikuspegi berberak erabili gabe. Ikasitakoa zabaltzeko, aberasteko eta finkatzeko jarduerak proposatzen ditu.
5.-Aniztasunari erantzun egokia emateko estrategiak diseinatzen ditu.
Puntuazioa - Maila [ ]
1. maila.-Ez da aniztasunari erantzuteko ahaleginik sumatzen. Irakasleak taldea homogeneoa balitz bezala ematen ditu azalpenak eta proposatzen ditu jarduerak. Gehienez ere, ikaskuntzan desfasea duten ikasleei laguntzeko jarduera batzuk aurreikusten ditu. Ez du sentsibilitaterik agertzen aniztasunaren tratamenduarekiko eta, beraz, ez du alderdi hau lantzeko estrategia didaktikorik diseinatzen modu serio eta koherentean.
2. maila.-Irakasleak ahalegina egiten du azalpenak eta lana klaseko "batez besteko" egoerara egokitzeko, zailtasun gehien duten ikasleak ahaztu gabe. Denbora eta eremuen antolaketa aurreikusten du, ikasteko erritmo eta maila desberdinak dituzten ikasleei laguntzeko ikasgela barnean; jarduera errazagoak planteatzen dizkie, unean-unean gehien behar dutenei laguntzeko, etab. Hori guztia ikasgelako ikasle guztiekin lan egiteko joerari segituz.
3. maila.-Irakasleak aniztasunari erantzuteko moduan antolatua du klasea. Taldearentzako estrategiak eta bakarkako lanak bateratzen ditu. Ikasleek lan pertsonalizaturako jarraibideak dituzte. Gainera, beharrezkoa duten ikasleentzat curriculumak egokitzeko lanean parte hartzen du.
6.-Testuliburua eta beste material didaktiko batzuk erabiltzea.
Puntuazioa - Maila [ ]
1. maila.-Irakaslea testuliburuari hertsiki eta mekanikoki lotzen zaio. Ez du bere azalpenik ematen edo ekarpenik egiten liburukoa osatzeko. Noiz edo noiz, baina oso gutxitan, kontsultarako beste material bat edo beste baliabide material osagarri batzuk erabiltzen ditu. Baina, oro har, mekanikoki eta hitzez hitz segitzen ditu testuliburuko jarduerak.
2. maila.-Irakasleak ikasgelako lanaren ardatz gisa erabiltzen du testuliburua. Hala ere, azalpenak zabaltzen ahalegintzen da eta ariketak hautatu edo berak prestatzen ditu. Noizean behin beste baliabide material batzuk erabiltzen ditu informazio osagarria lortzeko. Testuliburua irakaslearen xedeen zerbitzura dago eta ez alderantziz.
3. maila.-Irakasleak testuliburua modu sortzaile eta pertsonalean erabiltzen du. Beste baliabide bat gehiago da. Beste baliabide batzuk ere erabili ohi ditu (prentsa idatzia, ikus-entzunezko baliabideak eta teknologikoak, kontsulta liburuak, liburutegia, etab.), ikasten diren gaien lagungarri eta osagarri.
Irakasle tutorea, departamentuko burua eta ikastetxeko zuzendaria praktiketako funtzionarioaren bi eskoletara joanen dira gutxienez, eta ikasgelako lanari eta klasearen garapenari buruzko txostena eginen dute, bakoitzak bere aldetik, eta Batzorde Kalifikatzaileari igorriko diote 2008ko abenduaren 31 baino lehen.
II. ERANSKINA. Irakaslana
Sarrerako oharra: txostenen ereduak Hezkuntza Departamentuaren web orrialdean egonen dira: www.pnte.cfnavarra.es.
A) Departamentuko buruaren eta irakasle tutorearen txostenak praktiketako funtzionarioaren irakaslanari buruz
Praktiketako funtzionarioa:
Ikastetxea:
Adierazleak
1.-Departamentu didaktikoaren programazio didaktikoarekin bat datorren programazioa du.
Puntuazioa - Maila [ ]
1. maila.-Departamentuaren programazio didaktikoa ikasgelako programazioaren mailan zehazteko agiririk ez dago, edo dagoena ez dator bat departamentuaren programazio didaktikoarekin.
2. maila.-Departamentuaren programazio didaktikoa ikasturterako zehazten duen agiria egina dago, aginduzko elementuak jasotzen dituen ikasgelako programazio baten bitartez.
3. maila.-Ikasgelako programazioa kalitate handikoa da eta oso garatuta dago.
2.-Proposatutako helburu eta edukiak betetzeko egokiak diren jarduerak programatuz prestatzen dirtu klaseak.
Puntuazioa - Maila [ ]
1. maila.-Ez dago jarduera didaktikorik ikasgelako programazioan. Ez da inolako dokumenturik ageri, klaseak aurretik prestatzen dituela erakusten duenik.
2. maila.-Klaseak prestatzen dituenean, jarduera bereiziak programatu ohi ditu, ikasleen erritmo eta ezaugarri desberdinei egokitzeko (irakaslearen koadernoan, bere programazioan edo beste edozein dokumentutan, jardueren plangintza sistematikoa ikusten da, eta ez funtsik gabekoa).
3. maila.-Klaseak xehero-xehero prestatzen ditu. Behar dituen jardueren eta materialen plangintza egiten du. Nabarmen osatzen ditu testuliburuko jarduerak, eta horrek aberastu egiten du lantzen ari diren unitate didaktikoaren trataera.
3.-Ebaluazio irizpideak ezarri eta aplikatzen ditu, bai eta kalifikazio irizpideak ere, eta horiek bat datoz aurreikusitako helburu eta edukiekin.
Puntuazioa - Maila [ ]
1. maila.-Ez du ongi zehaztutako irizpiderik ikasleek ikasten dutena ebaluatzeko, eta batzuk baldin baditu, ez datoz bat programazioan aurreikusitako helburu eta edukiekin. Ez du halako irizpideak biltzen dituen dokumenturik.
2. maila.-Programazioaren helburu eta edukiekin bat datozen ebaluazio eta kalifikazio irizpideak dauzka. Egiten dituen kontrol guztietan eta erabiltzen dituen behaketa eskaletan aplikatzen ditu, bai eta ikasleen lanak baloratzeko irizpideetan ere. Agirien bidez egiaztatu daiteke arestikoa.
3. maila.-Aurrekoaz gain, irizpideak oso ongi azalduta daude. Helburuen eta edukien dimentsio guztiak biltzen dituzte: kontzeptuak, prozedurak, jarrerak. Ebaluazio irizpide bakoitzak adierazten du nola gauzatuko den, zein tresnaren bitartez eta nola ponderatuko den bildutako informazioa. Noiz aplikatuko diren azaltzeko informazioa ere ematen da. Horretaz guztiaz dokumentazio idatzia dago, eta horri esker ikus daiteke irizpideak badirela eta kurtsoan nola aplikatuko diren.
4.-Ebaluazioari buruzko planteamendu sistematiko eta zorrotza du. Hasierako ebaluazioa egiten du, ikasleek aurretik dakitenaren eta beren trebetasun eta jarreren gaineko informazioa lortzeko; ikaskuntzan izaten den aurrerapenari buruzko ebaluazioa egiten du, bai eta horien azken ebaluazioa ere.
Puntuazioa - Maila [ ]
1. maila.-Irakasleak ez du ebaluazioari buruzko planteamendu sistematiko eta zorrotza. Noizean behin kontrolak egiten ditu, batere planifikaziorik gabe. Ez dago ebaluazioaren planteamendua biltzen duen dokumenturik.
2. maila.-Irakasleak ebaluazioari buruzko planteamendu sistematiko eta zorrotza du. Kurtsoaren hasieran ikasleen gaineko informazioa biltzen du, programazio orokorra egokitzeko eta ikasle guzti-guztiak ezagutzeko. Agerpen objektibo batzuek erakusten dute hasierako ebaluazioa egin dela eta irakasleak ikasle bakoitzari buruzko informazioa duela kurtso hasieratik. Hasierako ebaluazioko emaitzen arabera gehiago landu beharko liratekeen alderdiei buruzko jarraibideak ematen dituen dokumenturen bat bada. Denboraldi laburretan kontrolak edo informazioaren bilketa sistematikoa egiten ditu ikasleen ikaskuntzaren gainean (kurtsoan sei aldiz gutxienez). Dokumenturen batean azaltzen da nola egiten den ebaluazioaren azken sintesia.
3. maila.-Aurrekoaz gain, ikasle bakoitzari buruzko informazio idatzi sakona du, eta maiz itzultzen die informazioa ikasleei eta gurasoei (hiruhileko bakoitzean hiru aldiz gutxienez).
5.-Ikasleek ikasten dutena ebaluatzeko zenbait tresna dauzka eta aplikatu egiten ditu, eta bat datoz programazioan zehaztutako ebaluazio irizpideekin.
Puntuazioa - Maila [ ]
1. maila.-Ez du ikasleek ikasten dutena ebaluatzeko tresnarik edo eskasak dira eta noizean behin eta zorroztasun gutxirekin aplikatzen ditu.
2. maila.-Zenbait tresna dauzka, programazioko ebaluazio irizpideekin bat datozenak, programazioan ageri diren eduki mota desberdinak -kontzeptuak, prozedurak, jarrerak- ebaluatzeko (gutxienez: kontrolak, behaketa sistematikoaren orriak eta ikasleen lanak baloratzeko irizpideak).
3. maila.-Horretaz gain, aurreikusitako ebaluazio tresnak kalitate tekniko handikoak dira. Fidagarritasunaren eta baliozkotasunaren irizpide teknikoak errespetatzen dituzte.
6.-Ikasle bakoitzaren jarraipen pertsonalizatua egiten du eta ebaluazio prozesuko etapetan jasotako informazioa eta egindako behaketak erregistratzen ditu (lanen zuzenketak, proben emaitzak, ikasleen zailtasun eta lorpenak, ikaskuntzari buruz dituzten jarrerak...).
Puntuazioa - Maila [ ]
1. maila.-Irakasleak ez ditu normalean behaketak erregistratzen eta ez du informazioa biltzeko tresnarik. Ikasten denaren azken ebaluazioaren emaitza gisa egiten dituen idatzoharrak baizik ez ditu erregistratzen.
2. maila.-Ikasten dena ebaluatzeko prozesu osoan erregistratzen ditu idatzoharrak (hasierako ebaluazioa, prozesukoa eta azkena), eta ikasleek ikaskuntzari buruz dituzten jarrerak, beren zailtasunak eta halakoak ere erregistratzen ditu.
3. maila.-Horretaz aparte, ikasle bakoitzaren fitxa bat dauka, eta bertan biltzen du: ikasleen ezaugarri pertsonalei buruzko informazio zehatza, egoeren aurrean izaten dituzten erreakzio eta zailtasunak, horiek erakusten baitute zer soziabilitate maila duten eta taldean edo ikasgelan nola integratuta dauden, etab.
7.-Ebaluazio bilkuretan aktiboki parte hartzen du.
Puntuazioa - Maila [ ]
1. maila.-Ez du ebaluazio bilkuretan parte hartzeko interesik erakusten. Erraz jartzen ditu bilkuretara ez joateko aitzakiak. Ebaluazio bilkura osatzen duen irakasle taldearen eztabaida eta lanetan noiz edo noiz hartzen du parte.
2. maila.-Bilkuretako eztabaidetan parte hartu ohi du, eta proposamenak egiten ditu.
3. maila.-Bilkuretako eztabaida eta lanetan oso modu aktiboan parte hartu ohi du eta irakasle talde ebaluatzailea aberasten duten ekarpen eta proposamenak egiten ditu.
8.-Orientazio Departamentuarekin, irakasleekin (irakasleen taldea, departamentu didaktikoa...) eta KPBarekin batera lan egiten du, programazio orokorrean, zikloko programazioan, ikasgelako programazioan eta ebaluazio bilkuretan ezarritako neurriak prestatzeko, aplikatzeko eta horiei jarraipena egiteko.
Puntuazioa - Maila [ ]
1. maila.-Irakasleak ez du inolako lankidetzarik orientazioaren eta laguntzaren arloan aritzen diren beste profesional batzuekin, ezta aniztasunari erantzuteko plana prestatzen edo ikastetxeko irakaskuntzako organo kolegiatuek ematen dituzten jarraibideen aplikazio eta jarraipenean ere. Ez du talde lanerako joera handirik eta ez dago integratuta irakasleen taldean ez eta departamentu didaktikoan. Gutxitan esaten du zerbait irakaslanaren garapenari buruz.
2. maila.-Lankideekin batera aritzen da aniztasunari erantzuteko jarduerak, ikasgelako programaziokoak, garapen kurrikularrekoak eta programazio orokorrekoak prestatzen.
3. maila.-Gainera, aktiboki parte hartu ohi du irakaskuntza jardueren jarraipena eta ebaluazioa egiten, eta horiek hobetzeko neurriak proposatzen ditu.
B) Ikastetxeko zuzendariaren txostena praktiketako funtzionarioaren irakaslanari buruz
Praktiketako funtzionarioa:
Ikastetxea:
Adierazleak.
1.-Ordutegi pertsonala betetzen du: klasera joatea.
Puntuazioa - Maila [ ]
1. maila.-Ez du lan ordutegia betetzen. Ez da klasera joaten eta ez du arrazoi egokirik ematen.
2. maila.-Zehatz-mehatz betetzen du lan ordutegia. Ez du hutsik egiten, eta, egiten badu, arrazoi justifikatu bat izaten du.
3. maila.-Aurrekoaz gainera, ezinbesteko arrazoiengatik klasera joaterik ez duenean, beste aukera batzuk bilatzen ditu, ikasleei ahalik eta kalterik gutxien egiteko. Lan prestatua uzten du guardiako irakaslearentzat. Lan hori oso ongi prestatuta egon ohi da eta informazio eta orientazio asko izaten du.
2.-Ordutegi pertsonala betetzen du: puntualtasuna.
Puntuazioa - Maila [ ]
1. maila.-Ez du lan ordutegia betetzen. Klasera berandu iristen da eta ez du arrazoi egokirik ematen.
2. maila.-Zehatz-mehatz betetzen du lan ordutegia. Beti puntual iristen da, eta, noiz edo noiz berandu iristen denean, arrazoi justifikatua izaten du.
3. maila.-Aurrekoaz gainera, ordua baino lehentxeago iristen ahalegintzen da, klasea antolatzeko, ikasleak iristen direnerako dena prest egon dadin. Beharrezkoa denean, nahitaezko denbora baino gehiago behar duten aparteko egoerez arduratzeko prest agertzen da (aita edo amaren bat hartu, geroko utzi ezin diren presazko gaiak konpondu, etab.).
3.-Puntual joaten da deitzen diren bileretara.
Puntuazioa - Maila [ ]
1. maila.-Ez da puntual joaten bileretara (klaustroak, zikloko bilerak, etab.). Funts handirik gabeko aitzakiak jartzen ditu.
2. maila.-Bete beharrekoak zehatz-mehatz betetzen ditu. Beti puntual iristen da bileretara, eta, noiz edo noiz berandu iristen denean, arrazoi justifikatua izaten du.
3. maila.-Aurrekoaz gainera, bilera hasteko ordua baino lehentxeago iristen ahalegintzen da, bilera ezarritako orduan hasi ahal izateko. Bileretan, puntualtasunaren eta ordenaren aldeko giroa eta jarrerak sortzen laguntzen du.
4.-Korridoreetan, patioetan eta, oro har, ikastetxeko instalazioetan, ordena eta diziplina jartzen laguntzen du.
Puntuazioa - Maila [ ]
1. maila.-Bere irakasle eginkizunetan alde batera uzten du ikasleen sarrera-irteeretan, klase aldaketetan eta abarretan ordena eta diziplina jartzeko lana. Arduragabe jokatzen du jolas orduetako zainketan eta ikasleak ikastetxetik irteten direnean jarduera osagarriak egitera. Guardiak ez ditu behar bezala betetzen. Zenbaitetan ez du gogo onez hartzen beste irakasle batzuen ordezkapenak egitea.
2. maila.-Bere irakasle eginkizunak betetzen ditu ikasleen sarrera-irteeretan, klase aldaketetan eta abarretan ordena eta diziplina jartzeari dagokionez. Arduraz jokatzen du jolas orduetako zainketan eta ikasleak ikastetxetik irteten direnean jarduera osagarriak egitera. Guardiak behar bezala betetzen ditu. Ez du gogo txarrez hartzen beste irakasle batzuen ordezkapenak egin behar izatea.
3. maila.-Aurrekoaz gain, oso aktiboa da arlo hauetan: asko saiatzen da korridoreetan, patioetan eta halakoetan egin beharreko zainketa lanean.
5.-Bere lanean ordenatua, sistematikoa eta arduratsua da.
Puntuazioa - Maila [ ]
1. maila.-Bere lanean ez da ez ordenatua ez sistematikoa. Ez ditu garaiz aurkezten eskatzen zaizkion agiriak edo lanak. Bere dokumentazioa (programazioak, agiri administratiboak, etab.) ez dago ez ordenatuta ez antolatuta. Klaseak desorden itxura izaten du. Erantzukizuna beste batzuen gain uzteko joera du.
2. maila.-Pertsona ordenatua da. Zehatz-mehatz betetzen ditu eskatutako lanak aurkezteko epeak. Bere klasean ordena nabari da; bere dokumentazioa antolatuta dago eta erraz aurkitzen du eskatzen zaiona. Arduraz egiten du lan.
3. maila.-Aurrekoaz gainera, ardura handiz eta prestasunez aritzen da lanean eta eskatzen zaizkion zereginetan. Zereginak arin eta eraginkortasunez egiten ditu.
6.-Gogo onez hartzen ditu ikastetxean denenak diren zereginak.
Puntuazioa - Maila [ ]
1. maila.-Gehienetan ez du gogo onez hartzen ikastetxean denenak diren zereginetan laguntzea. Bere klaseetatik kanpoko arloetan lan egiteko gogo handirik ez du erakusten.
2. maila.-Ikastetxeko zereginen baterako dei egiten zaionean, laguntza ematen du. Ez dio besterik gabe uko egiten ikastetxeak funtzionamendu hobea izateko beharrezkoak diren lanei.
3. maila.-Aurrekoaz aparte, gogo onez hartzen ditu beti ikastetxeak funtzionamendu hobea izateko beharrezkoak diren lan eta zereginak. Bere lankideei kemena eta motibazioa eransten die, ikastetxeak funtzionamendu hobea izateko beharrezkoak diren lan eta zereginetan laguntzeko.
7.-Talde lanerako gaitasuna erakusten du.
Puntuazioa - Maila [ ]
1. maila.-Gehienetan ez du gogo onez hartzen taldean lan egitea. Taldean aritzen denean, jarrera pasiboa izaten du eta ez du parte hartzen, edo oztopatu egiten du taldeko lana.
2. maila.-Talde lanen baterako dei egiten zaionean, laguntza ematen du. Ez die besterik gabe uko egiten talde lanei.
3. maila.-Aurrekoaz aparte, gogo onez hartzen ditu beti talde lanerako beharrezkoak diren lan eta zereginak. Buruzagi petoa da.
8.-Klaustroetan eta gainerako parte-hartze eta lankidetza organoetan parte hartzen du.
Puntuazioa - Maila [ ]
1. maila.-Gehienetan jarrera negatiboak izaten ditu klaustroetan.
2. maila.-Gehienetan jarrera positiboak izaten ditu klaustroetan. Eskola Kontseiluan lantzen diren gaietan interesa izaten du. Bere iritzi eta proposamenak ezarritako bideetatik helarazten ditu.
3. maila.-Aurrekoaz gainera, aktiboki hartzen du parte klaustroetan, klaustroari batasuna eta koherentzia ematen dioten ideia eta proposamen eraikitzaileak aurkeztuz.
9.-Jarduera osagarrietan eta eskolaz kanpokoetan aritzen da.
Puntuazioa - Maila [ ]
1. maila.-Ez du interesik jartzen jarduera osagarrietan. UPOn onetsitako jarduera osagarriak ez ditu betetzen edo oso modu errutinarioan egiten ditu, curriculumaren ingurunetik kanpo.
2. maila.-Interesa jartzen du jarduera osagarrietan. UPOn onetsitako jarduera osagarriak modu positiboan egiten ditu. Zikloko bileretan jarduera osagarriak proposatzen ditu, ikaskuntzarako lagungarri den baliabide didaktiko gisa.
3. maila.-Horretaz aparte, aktiboki parte hartzen du jarduera osagarrien diseinuan. Sortzailea da jarduera osagarri berriak proposatzen dituenean. Dedikazio berezia izaten du era horretako jardueretan. Eskolaz kanpoko jardueretan ere proposamenak egiten ditu eta nolabait parte hartzen du.
10.-Modu pertsonalizatuan arduratzen da ikasleez.
Puntuazioa - Maila [ ]
1. maila.-Ez da behar bezala arduratzen ikasleez, eta ez ditu orientatzen ikaste prozesuan eta garapen pertsonalean. Sentsibilitate gutxi erakusten du neska-mutikoen artean egunez egun sortzen diren arazo eta zailtasunen aurrean. Ikasleei ez die inolako jarraipenik egiten behar hori dutenean.
2. maila.-Ikasle bakoitzaren egoerarekiko interesa erakusten du, hala arlo akademikoan nola garapen pertsonalekoan. Ikasle bakoitzari gertatzen zaionaz arduratzen da. Klasera joaten ez diren ikasleen jarraipena egiten du egunero, eta agertu ez izanaren arrazoiez interesatzen da.
3. maila.-Aurrekoaz gainera, ikasleek konfiantza handia dute irakaslearengan, eta berarengana jotzen dute arazoren bat dutenean. Irakasle bikaina da bai hezkuntzaren arloan bai giza balioetan.
11.-Modu pertsonalizatuan hartzen ditu gurasoak edo legezko tutoreak.
Puntuazioa - Maila [ ]
1. maila.-Gurasoak ez ditu behar bezala hartzen, eta ez dizkie behar diren argibideak ematen beren seme-alabek eskolan duten egoerari buruz. Sentsibilitate gutxiz jokatzen du gurasoekin izaten dituen harremanetan. Behin eta berriz izaten dira kexak hori dela eta.
2. maila.-Ikasle bakoitzak arlo akademikoan eta garapen pertsonalekoan duen egoerari buruz gurasoekin hitz egiteko interesa erakusten du. Gorabeheraren bat izanez gero, horren berri emateaz arduratzen da. Ez da zain egoten gurasoek elkarrizketa bat eskatu arte, planteamendu sistematikoa baitu haiekin guztiekin hitz egiteko.
3. maila.-Aurrekoaz gainera, gurasoek konfiantza handia dute irakaslearengan, eta berarengana jotzen dute arazoren bat dagoenean. Gurasoek irakasle bikaintzat dute, bai hezkuntzaren arloan bai giza balioetan.
Praktikaldia bukatzean, irakasle tutoreak, departamentuko buruak eta ikastetxeko zuzendariak txosten bana eginen dute praktiketako funtzionarioaren irakaslanari buruz, ebazpen honen II. eranskinean dauden alderdiei buruzko balorazioa eta interesgarritzat jotzen dituzten bestelakoen berri emateko. Txostena Batzorde Kalifikatzaileari igorriko diote 2009ko martxoaren 31 baino lehen.
