navarra.es
Castellano | Euskara | Français | English
Ezagutzera eman
79/2012 Foru Agindua, abuztuaren 24koa, Landa Garapeneko, Ingurumeneko eta Toki Administrazioko kontseilariak emana, Nafarroan produktu fitosanitarioak aplikatzeko ekipamenduen aldian aldiko ikuskapenen sistema ezartzen duena
(2012ko 195. NAOn argitaratutako testua, urriaren 3an)
Atarikoa
Ongi funtzionatzen duten produktu fitosanitarioak aplikatzeko ekipamenduen erabilerak produktuen banaketa homogeneoa bermatzen du eta ongi dosifikatzeko aukera ematen du, tratamenduen eraginkortasuna ziurtatuz eta, aldi berean, pertsonen osasunarentzat eta ingumenarentzat kaltegarriak diren ondorioak murriztuz. Aplikaziorako ekipamenduen erregulazioan izaten diren akatsek, matxurek edo desdoikuntzek produktuaren banaketa ez-ohikoak, jarioak edo isurketak ekar ditzakete, eta horiek, pertsonen osasuna eta ingurumena arriskuan jartzeaz gainera, tratamenduei eraginkortasuna kentzen diete eta galera ekonomikoa eragiten diete nekazariei. Ongi funtzionatzen duten ekipamenduak izanez gero, matxuren ondoriozko geldialdiak murrizteaz gainera, ustiapenetan sargaien eta energiaren kontsumoan aurreztu egin daiteke eta produkzioa handitu. Horiek horrela, ezinbestekoa da ekipamenduen aldian aldiko ikuskapenak egitea, funtzionamendu egokian eragina izan dezakeen edozein arazo zuzentzeko.
Landare Osasunari buruzko azaroaren 20ko 43/2002 Legeak Estatuko araudi esparrua osatzen du izurriei aurrea hartu eta horiek kontrolatzeko jarduerak arautzearen arloan, bai eta babes fitosanitarioko baliabideen kasuan ere, nekazaritzako pestizidak aplikatzeko ekipamenduak edo makineria barne; horiek, halaber, zenbait alderditan Europar Batasunaren legediari lotuta daude, bereziki, Europako Parlamentuak eta Kontseiluak 2006ko maiatzaren 17an makinei buruz emandako 2006/42/EE Zuzentarauari (95/16/EE Zuzentaraua aldatu zuen), zeina barne antolamendu juridikoan urriaren 10eko 1644/2008 Errege Dekretuaren bidez sartu baitzen (dekretu horrek makinak merkaturatzeko eta zerbitzuan jartzeko arauak ezartzen ditu), eta Europako Parlamentuak eta Kontseiluak urriaren 21ean emandako 2009/127/EE Zuzentarauari (2006/42/EE Zuzentaraua aldatu zuen), pestizidak aplikatzeko makinei dagokienez.
Nafarroako Foru Komunitatean, Landare Osasunari buruzko martxoaren 23ko 4/2007 Foru Legearen helburua da landare babeserako baliabideak, aplikaziorako makineria barne, erabilera, eragingarritasun eta segurtasun egoera onean daudela bermatzea. 20. artikuluak ezartzen du babes fitosanitariorako baliabideen erabilera pertsonen eta abereen osasuna babesteko helburuen menpe egonen dela, eta ingurumena errespetatzen duen nekazaritza iraunkorraren garapenarekin bat etorriko dela.
Bestalde, Europako Parlamentuak eta Kontseiluak urriaren 21ean emandako 2009/128/EE Zuzentarauak (Europar Batasuneko jarduketaren esparrua ezartzen du pestiziden erabilera iraunkorra lortze aldera) 8. artikuluan ezartzen du estatu kideek begiratuko dutela ea aldian aldiko ikuskapenak egiten zaizkien pestizidak aplikatzeko ekipamendu profesionalei.
Azaroaren 18ko 1702/2011 Errege Dekretuaren bidez, gure antolamendu juridikoan sartu da pestiziden erabilera iraunkorrari buruzko aipatu zuzentarauaren 8. artikulua, eta Landare Osasunari buruzko 43/2002 Legea araudi bidez garatu da, produktu fitosanitarioak aplikatzeko makinak mantendu eta prest jartzearen gaineko baldintzak betetzen diren egiaztatzeko kontrol ofizialei dagokienez. Xedatu da autonomia erkidegoei dagokiela beren lurraldean ikuskapenen programa kontrolatu eta aplikatzeko ardura izanen duen organo eskuduna izendatzea. Halaber ezartzen du autonomia erkidego bakoitzeko organo eskudunaren ardura izanen dela ikuskatu beharreko ekipamenduen zentsua egin eta kudeatzea, produktu fitosanitarioak aplikatzeko ekipamenduen ikuskapen teknikorako estazioak baimentzea eta bere lurraldean baimendutako Ikuskapeneko Prestakuntza Unitateak ezartzea.
Landa Garapen, Industria, Enplegu eta Ingurumeneko kontseilariaren maiatzaren 8ko 241/2012 Foru Aginduaren bidez, Nekazaritza eta Abeltzaintza Zuzendaritza Nagusia izendatu da 1702/2011 Errege Dekretuan ezarritako ikuskapen programa Nafarroan kontrolatu eta aplikatzeaz arduratuko den organo eskuduna izateko.
Kontuan harturik Nafarroako Unibertsitate Publikoak, Landa Ingeniaritzaren eta Proiektuen Sailaren bitartez, esperientzia zabala duela nekazaritzako mekanizazioaren ikerketan eta prestakuntzan, Nekazaritza eta Abeltzaintza Zuzendaritza Nagusiak uste du komenigarria dela Nafarroako Unibertsitate Publikoa Prestakuntza Unitate baimendu gisa izendatzea.
Nekazaritza eta Abeltzaintza Zuzendaritza Nagusiak proposaturik, bidezkoa da arau bat ematea, produktu fitosanitarioak aplikatzeko ekipamenduen aldian aldiko ikuskapenen sistema ezartzeko eta horien funtzionamendua arautzeko Nafarroako Foru Komunitatean.
Azaldutakoarekin bat, eta Nafarroako Gobernuari eta Lehendakariari buruzko abenduaren 3ko 14/2004 Foru Legearen 41.1.g) artikuluak ematen dizkidan eskudantziak erabiliz, agindu dut:
I. KAPITULUA. Xedapen orokorrak
1. artikulua. Xedea.
Foru agindu honen xedea da produktu fitosanitarioak aplikatzeko ekipamenduen aldian aldiko ikuskapenen sistema ezartzea eta horien funtzionamendua arautzea Nafarroako Foru Komunitatean.
2. artikulua. Definizioak.
Foru agindu honen ondorioetarako, produktu fitosanitarioak aplikatzeko ekipamenduen aldian aldiko ikuskapenei buruzko azaroaren 18ko 1702/2011 Errege Dekretuaren 2. artikuluan ageri diren definizioak aplikatuko dira.
3. artikulua. Aplikazio esparrua.
Foru agindu honen aplikazio esparruaren barnean sartuta daude produktu fitosanitarioak aplikatzeko ekipamenduen aldian aldiko ikuskapenei buruzko azaroaren 18ko 1702/2011 Errege Dekretuaren 3.1. artikuluan aipatzen diren ekipamendu guztiak.
II. KAPITULUA. Ikuskatu beharreko ekipamenduen zentsua
4. artikulua. Sortu eta kudeatzea.
Ikuskatu beharreko ekipamenduen Nafarroako Foru Komunitateko zentsua sortu da, eta Nafarroako Gobernuko Nekazaritza eta Abeltzaintza Zuzendaritza Nagusiak kudeatuko du.
5. artikulua. Ekipamenduak zentsuan sartzea.
1. Ekoizpen primarioan, nekazaritza eta basogintzakoan erabiltzen diren produktu fitosanitarioak aplikatzeko ekipamendu mugikorrak, Nekazaritzako Makineriaren Erregistro Ofizialean inskribatuak, ofizioz sartuko dira ikuskatu beharreko ekipamenduen zentsuan.
2. Beste erabilera profesional batzuetan produktu fitosanitarioak aplikatzeko ekipamendu mugikorrak, aireko tratamenduetan erabiltzen diren ekipamenduak eta berotegietako eta beste lokal itxi batzuetako ekipamendu finkoak titularrak eskaturik sartuko dira zentsuan, eta titular horrek nahitaezkoa izanen du zentsuan sartzeko eskaera egitea Nekazaritza eta Abeltzaintza Zuzendaritza Nagusiari.
3. Ikuskatu beharreko ekipamenduen zentsuan sartzeko eskaera, aurreko lerroaldean aipatua, Nekazaritza eta Abeltzaintza Zuzendaritza Nagusiak emandako ereduaren arabera eginen da. Eredu hori Nafarroako Gobernuaren web orriko zerbitzuen atarian eskura daiteke (www.navarra.es).
6. artikulua. Zentsua eguneratzea.
1. Nekazaritza eta Abeltzaintza Zuzendaritza Nagusiak urte bakoitzeko abenduaren 31n eguneratuko du zentsua, ekipamenduen bajak eta berrien sarrerak jasoz, eta Nekazaritza, Elikadura eta Ingurumen Ministerioari bidaliko dio hurrengo urteko martxoaren 31 baino lehen.
2. Produktu fitosanitarioak aplikatzeko ekipamendu mugikorren, Nekazaritzako Makineriaren Erregistro Ofizialean inskribatuen, zentsua ofizioz eguneratuko da.
3. Nekazaritzakoak eta basogintzakoak ez diren ekipamendu mugikorrei, aireko tratamenduetan erabiltzen diren ekipamenduei eta berotegietako eta beste lokal itxi batzuetako ekipamendu finkoei buruzko informazioa titularrak eskaturik edo ofizioz eguneratuko da, kontrol ofizialetan aldaketak atzematen direnean.
7. artikulua. Zentsuan jasotako informazioa.
1. Ikuskatu beharreko ekipamenduen zentsuak I. eranskinean ekipamendu mota bakoitzerako aipatzen den informazioa jasoko du, Datu Pertsonalak Babesteari buruzko abenduaren 13ko 15/1999 Lege Organikoan xedatutakoa betez betiere.
III. KAPITULUA. Prestakuntza
8. artikulua. Ikuskapenaren Prestakuntza Unitatea.
1. Nafarroako Unibertsitate Publikoa izendatzen da prestakuntza unitate baimendu gisa, ITEAFetako ikuskatzaileen eta zuzendari teknikoen prestakuntza ikastaroak emateko, azaroaren 18ko 1702/2011 Errege Dekretuaren 13.3 artikuluaren arabera.
2. Aurreko atalean xedatutakoa galarazi gabe, Nekazaritza eta Abeltzaintza Zuzendaritza Nagusiak zilegi izanen du aipatu errege dekretuan xedatutakoa betetzen duten beste prestakuntza unitate batzuk baimentzea.
3. Prestakuntza ikastaroak azaroaren 18ko 1702/2011 Errege Dekretuaren IV. eranskinean ezarritako irizpideen arabera emanen dira.
9. artikulua. Prestakuntza ikastaroen jakinarazpena.
1. Ikastaroak egin aurretik, hilabete lehenago gutxienez, Nafarroako Unibertsitate Publikoak ikastaroa egin aurreko jakinarazpena aurkeztuko du Nekazaritza eta Abeltzaintza Zuzendaritza Nagusian. Jakinarazpen horretan ikastaroaren datak, aurreikusitako programa eta irakasleak azalduko dira.
2. Ikastaroa bukatutakoan, Nafarroako Unibertsitate Publikoak emaitzen txostena aurkeztuko du Nekazaritza eta Abeltzaintza Zuzendaritza Nagusian. Txosten horretan azalduko da ikastaroa gainditu eta, beraz, hurrengo artikuluaren araberako gaitasun agiria lortu duten ikasleen zerrenda.
10. artikulua. Gaitasun agiria.
1. Prestakuntza unitateak gaitasun agiria emanen die ITEAFetako zuzendari teknikoentzako eta ikuskatzaileentzako prestakuntza ikastaroak egin eta gainditzen dituzten ikasleei.
2. Foru agindu honen II. eranskinean ezarritako informazioa jasoko du gutxienez gaitasun agiriak.
3. Agiri hori 5 urtean behin berritu beharko da eta, horretarako, beharrezkoa izanen da ezagutzak eguneratzeko prestakuntza jarduera bat egitea.
IV. KAPITULUA. Ikuskapen estazioak (ITEAF)
11. artikulua. ITEAFen betekizunak.
1. ITEAFen titular izaten ahal dira produktu fitosanitarioak aplikatzeko ekipamenduen aldian aldiko ikuskapenei buruzko azaroaren 18ko 1702/2011 Errege Dekretuaren 7. artikuluko lehen lerroaldean aipatzen diren entitateak eta enpresak, baldin eta produktu fitosanitarioak aplikatzeko ekipamenduak fabrikatzen, merkaturatzen edo konpontzen aritzen diren enpresak ez badira.
2. Administrazio Publikokoak ez diren ITEAFek erantzukizun zibileko polizak, abalak edo beste finantza berme batzuk sinatu beharko dituzte, beren erantzukizunaren arriskuak estaltzeko, egiten dituzten ikuskapen teknikoen ondorioz ingurumenean, materialetan eta pertsonengan eragiten ahal diren kalteei dagokienez. 100.000 eurokoak izanen dira gutxienez, eta estalitako arriskuaren izaeraren eta norainokoaren proportziozkoak.
3. Zuzendari tekniko bat eta ikuskatzaile bat izan beharko dituzte gutxienez, betiere produktu fitosanitarioak aplikatzeko ekipamenduen aldian aldiko ikuskapenei buruzko azaroaren 18ko 1702/2011 Errege Dekretuaren 8. artikuluan zehaztutako kualifikazioa badute, baita 10.1 artikuluan aipatutako gaitasun agiria ere, hots, kasuan kasuko prestakuntza programa gainditu dutela egiaztatzen duena.
4. Ikuskapenak zuzen egiteko beharrezkoak diren ekipamenduak eta tresneria izan beharko dituzte, eta produktu fitosanitarioak aplikatzeko ekipamenduen aldian aldiko ikuskapenei buruzko azaroaren 18ko 1702/2011 Errege Dekretuaren 9. artikuluan xedatutakoari jarraitu.
12. artikulua. ITEAFak baimentzea.
1. ITEAFak titularrek eskaturik baimenduko dira beti, aurreko artikuluan ezarritako betekizunak frogatu eta gero.
2. Baimena lortzeko eskaera Nekazaritza eta Abeltzaintza Zuzendaritza Nagusiari bidalitako eskabide orokor baten bidez aurkeztuko da, eta, horrekin batera, foru agindu honen III. eranskinean aipatzen diren agiriak aurkeztuko dira.
3. Eskaerak aurreko atalean aipatzen diren baldintzak betetzen ez baditu, interesdunari eskatuko zaio 10 eguneko epean akatsak zuzentzeko edo agindutako agiriak aurkezteko. Halaber, jakinaraziko zaio, hori egin ezean eskaerari uko egin diola ulertuko dela. Halakoetan, Nekazaritza eta Abeltzaintzako zuzendari nagusiak ebazpen bat emanen du.
4. Aurkeztutako eskaera eta agiriak aztertu ondoren, Nekazaritza eta Abeltzaintzako zuzendari nagusiak ITEAFak baimentzeko ebazpena emanen du, produktu fitosanitarioak aplikatzeko ekipamenduen ikuskapen teknikoak egin ditzaten, edo, bestela, ezetza emanen dio eskaerari, behar bezala arrazoiturik.
5. Artikulu honen lehen lerroaldean aipatzen den baimena emateko oinarri izandako baldintzetan edo betekizunetan aldaketaren bat izaten bada, Nekazaritza eta Abeltzaintza Zuzendaritza Nagusiari jakinarazi beharko zaio. Edonola ere, aldaketa horien ondoriozko baldintzek ere foru agindu honetan ezarritako betekizunak bete beharko dituzte.
6. ITEAFek produktu fitosanitarioak aplikatzeko ekipamenduen ikuskapen teknikoak egiteko lortzen duten baimenak mugagabeko eperako izanen du balioa, baldin eta 13. artikuluan ezarritakoaren arabera baliogabetzen ez bada.
13. artikulua. Baimenak baliogabetzea.
1. Nekazaritza eta Abeltzaintza Zuzendaritza Nagusiak emandako baimenak baliorik gabe uzten ahalko dira egoera hauetakoren bat izaten denean:
a) ITEAFaren titularrak baimena baliogabe dadila eskatzea.
b) Baimena lortzeko oinarri izandako baldintzak ez betetzea.
c) Ikuskapen teknikoak 15. artikuluan ezarritako baldintzak bete gabe egitea.
d) Instalazioak kontserbazio eta egokitasun teknikoko baldintza onetan edukitzeko baldintza ez betetzea, ez betetze horrek ikuskapen zerbitzuen kalitatea larriki urritzen duenean edo pertsonak, ondasunak edo ingurumena ageriko arriskuan jartzen dituenean.
e) Produktu fitosanitarioak aplikatzeko ekipamenduen ikuskapenerako eskaerak hartzeari ezetza ematea, eta ikuskapenaren ondoriozko agiriak ez ematea.
f) Erregelamenduzko ikuskapenak edo egiaztapenak edo Nekazaritza eta Abeltzaintza Zuzendari Nagusiak hitzartuak onartzeari ezetza ematea, edo zeregin hori oztopatzea.
2. Baimena, baliogabetzearen ondorioz, iraungitzeko prozedura hasi baino lehen, titularrari jakinaraziko zaio zein egoerak ekar dezakeen iraungitze hori, atzemandako hutsuneak, hala denean, zuzen ditzan.
V. KAPITULUA. Produktu fitosanitarioak aplikatzeko ekipamenduen ikuskapen teknikoak
14. artikulua. Ikuskapenen programa.
1. Nekazaritza eta Abeltzaintza Zuzendaritza Nagusiak ebazpen baten bidez onetsiko du ikuskapenen urteko programa; horren barnean sartuko dira kasuan kasuko urtean ikuskatu beharreko ekipamenduak, titularren ezaugarriak, ikuskapenak egiteko azken eguna eta Nafarroan aritzen diren ITEAFen zerrenda. Programazioari dagokion urtearen aurreko urteko azaroaren 30a baino lehen onetsiko da ikuskapenen programa.
2. Nekazaritza eta Abeltzaintza Zuzendaritza Nagusiak lehen aldiz ikuskatu behar diren ekipamenduen titularrei ondokoa jakinaraziko die: ikuskapenen urteko programan sartu direla, beren ekipamendua ikuskatzeko azken eguna eta Nafarroan ikuskapenak egiten dituzten ITEAFen zerrenda. Ekipamendua ikuskatzeko azken eguna baino bi hilabete lehenago gutxienez eginen da jakinarazpen hori.
3. Aplikaziorako ekipamenduak, 2011ko abenduaren 10a baino lehen eskuratu badira lehen aldiz, 2016ko azaroaren 26ra arteko ikuskapenen programan sartuko dira, eta lehentasuna emanen zaio gehien erabiltzen diren edo arrisku handiena duten ekipamenduak ikuskatzeari. IV. eranskineko irizpideen arabera ezarriko da ikuskapenen lehentasuna.
4. 2011ko abenduaren 9aren ondotik eskuratutako ekipamendu berri guztiak lehenengo bost urteko epean ikuskatu beharko dira; horregatik, ekipamenduak 5 urteko antzinatasuna betetzen duen urteko ikuskapen programan sartuko dira.
5. 2016ko azaroaren 26tik aurrera, ikuskapenen urteko programan sartuko dira azken ikuskapenetik bost urte egin dituzten ekipamenduak; halaber, ekipamenduen titularrak nekazaritza lanetako zerbitzu enpresak, nekazaritzako kooperatibak eta nekazarien beste elkarte batzuk direnean, baita hamar ekoizle baino gehiago biltzen dituzten ondasun elkarteak ere, azken ikuskapenetik hiru urte pasatu badira.
6. 2020. urtetik aurrera, ikuskapenen urteko programan sartuko dira kasuan kasuko urtean hiru urteko antzinatasuna duten ekipamenduak edo azken ikuskapen teknikotik hiru urte egin dituztenak.
15. artikulua. Ikuskapenak egitea.
1. ITEAF estazioek soilik egiten ahalko dituzte ikuskapenak, baina, betiere, ITEAFak zein autonomia erkidegotan kokatuak dauden eta non aritzen diren, autonomia erkidego horretako organo eskudunak aldez aurretik baimenduta badaude. Nafarroako Foru Komunitateko organo eskudunak baimendu ez dituen baina Nafarroan ikuskapenak egin behar dituzten ITEAFek Nekazaritza eta Abeltzaintza Zuzendaritza Nagusiari jakinarazi beharko diote aldez aurretik, haien jarduera kontrolatu ahal izateko.
2. Nekazaritza eta Abeltzaintza Zuzendaritza Nagusiak Nafarroako Gobernuaren web orriko (www.navarra.es) zerbitzuen atarian jarriko du Nafarroan ikuskapenak egiten dituzten ITEAFekin harremanetan jartzeko helbidea.
3. Ikuskapenen urteko programan sartutako ekipamenduen titularrak beren ekipamendua dagokion epean ikuskatzeko bidean jartzearen erantzuleak izanen dira, eta ekipamendu horiek zein ITEAFek ikuskatzea nahi duten aukeratzen ahalko dute.
4. Ikuskapenak Nafarroan egiten dituzten ITEAFek aukera izanen dute ikuskatu beharreko ekipamenduen zentsua, 4. artikuluan aipatua, ikusteko, ekipamenduak zentsatuta daudela egiaztatu ahal izateko, ikuskapena egin baino lehen.
5. ITEAFek produktu fitosanitarioak aplikatzeko ekipamenduen aldian aldiko ikuskapenei buruzko azaroaren 18ko 1702/2011 Errege Dekretuaren 11. artikuluan ezarritakoaren arabera eginen dituzte ikuskapenak, bai eta Nekazaritza, Elikadura eta Ingurumeneko Ministerioak bere helbide elektronikoan emandako Ikuskapenen Eskuliburuarekin bat ere.
16. artikulua. Ikuskapenen emaitza.
1. Ekipamendu baten ikuskapena bukatutakoan, ITEAFak ikuskapeneko ziurtagiri bat eginen du eta interesdunari emanen zaio, emaitzen buletinarekin batera. Bi agiri horiek 1702/2011 Errege Dekretuaren III. eranskinean ageri den gutxieneko informazioa jaso beharko dute. ITEAFak gutxienez ere 5 urtez gorde beharko du bi agiri horien kopia, eta agiri horiek formatu elektronikoan gordetzeko aukera ere izanen da.
2. Ikuskapenaren emaitza aldekoa denean, ITEAFak bereizgarri autoitsaskor bat emanen dio ekipamenduaren titularrari, eta ekipamenduaren ageriko toki batean jarri beharko du. Bereizgarria Nekazaritza eta Abeltzaintza Zuzendaritza Nagusiak onetsitako ereduaren araberakoa izanen da, eta honako hau eduki beharko du idatzita, gutxienez: ekipamenduari hurrengo ikuskapena egiteko muga urtea, ITEAFaren identifikazioa eta ikuskapenaren zenbaki adierazlea.
3. Ikuskapenaren emaitza aldekoa ez denean, ITEAFak ikuskapenaren ziurtagirian jasoko du hori, eta lehen ikuskapenaren egunetik hasita 30 eguneko epean ITEAFean beste ikuskapen bat egin behar dela adieraziko du. Ekipamendua ez da tratamenduak egiteko erabiliko, harik eta ikuskapenean emaitza positiboa lortu arte.
4. ITEAFak Nekazaritza eta Abeltzaintza Zuzendaritza Nagusira bidaliko du ikuskapenean aldeko emaitza lortu duten ekipamenduen zerrenda, baita aldekoa ez den emaitza dutenena ere, atzemandako akats larriak adierazita. Informazio hori gutxienez ere astean behin bidaliko da, Administrazioak ematen dituen bide elektronikoak erabiliz.
5. Nekazaritza eta Abeltzaintza Zuzendaritza Nagusiak urteko txostena eginen du Nafarroan egindako ikuskapenen emaitzak jasotzeko, eta Nekazaritza, Elikadura eta Ingurumen Ministeriora bidaliko du, hurrengo urteko martxoaren 31 baino lehen, bi aldeek adosten duten formatu digitalaren bitartez.
VI. KAPITULUA. Kontrolak, arau-hausteak eta zehapenak
17. artikulua. Kontrolak.
1. Nekazaritza eta Abeltzaintza Zuzendaritza Nagusiak beharrezkoak diren kontrolak eginen ditu, produktu fitosanitarioak aplikatzeko ekipamenduen ikuskapen teknikorako sistemak zuzen funtzionatzen duen egiaztatzeko, eta azaroaren 18ko 1702/2011 Errege Dekretuan eta foru agindu honetan xedatutakoa betetzen den ikusteko.
2. Landare Osasunari buruzko martxoaren 23ko 4/2007 Foru Legean ezarritakoari jarraikiz eginen dira kontrolak, eta ikuskatzaileek zilegi izanen dute lege horretan aurreikusitako kautelazko neurriak hartzea, zentsatuta egoteko betebeharra eta nahitaezko ikuskapen teknikoak egiteko betebeharra betetzen ez duten ekipamenduak ibilgetzea eta zigilatzea barne.
18. artikulua. Arau-hausteak eta zehapenak.
1. Azaroaren 18ko 1702/2011 Errege Dekretuan eta foru agindu honetan ezarritako betebeharrak hautsiz gero, Landare Osasunari buruzko martxoaren 23ko 4/2007 Foru Legeari jarraikiz zehatuko dira.
Azken xedapena.-Indarra hartzea.
Foru agindu honek Nafarroako Aldizkari Ofizialean argitaratu eta biharamunean hartuko du indarra.
I. ERANSKINA. Ikuskatu beharreko ekipamenduen zentsuan jasotako informazioa
Ikuskatu beharreko ekipamenduen zentsuak informazio hau jasoko du:
1) Produktu fitosanitarioak aplikatzeko ekipamendu mugikorrak:
-Titularraren izena/sozietatearen izena.
-Titularraren NAN/IFZ.
-Marka.
-Modeloa.
-Makinaren generoa (UNE 68051 araua).
-Bastidore zenbakia.
-Titularraren jardueraren zati nagusia zein herritan kokatuta dagoen.
2) Aireontzietan jarrita eramaten diren aplikaziorako ekipamenduak:
-Titularraren izena/sozietatearen izena.
-Titularraren NAN/IFZ.
-Ihinztapen sistema.
-Ponpa.
-Biltontzia.
-Aire unitatea.
-Tratamenduen zabalera.
-Ekipamenduaren kokapena.
3) Berotegien barnean edo beste lokal itxi batzuetan jarritako ekipamenduak.
-Titularraren izena/sozietatearen izena.
-Titularraren NAN/IFZ.
-Ihinztapen sistema.
-Ponpa.
-Biltontzia.
-Aire unitatea.
-Tratamenduaren azalera.
-Ekipamenduaren kokapena.
II. ERANSKINA. Gaitasun agiriaren edukia
Prestakuntza unitateak emandako gaitasun agiriak informazio hau jasoko du gutxienez:
-Prestakuntza unitatearen identifikazioa.
-Ikaslearen identifikazioa (izena eta IFZ).
-Ikasleak gainditutako prestakuntza programa aipatzea (ITEAFeko zuzendari teknikoa eta/edo ITEAFeko ikuskatzailea).
-Gaitasun agiriaren luzatze data.
-Gaitasun agiria gehienez ere bost urteko epean (luzatzen denetik hasita) berritu behar dela adieraztea.
III. ERANSKINA. ITEAFak baimentzeko eskaera
ITEAFak baimentzeko eskaerarekin batera, honako agiri hauek aurkeztuko dira:
-Enpresa edo entitatea zuzentzen duten estatutuak edo araua.
-Memoria teknikoa, ondoko hau deskribatuko duena:
- Prest dauden langileak eta horien kualifikazioa.
- Erabiltzeko prest dauden instalazioak eta ekipamendu teknikoa.
- Ikuskapenetan erabiltzen diren neurgailuak kalibratzeko prozedurak.
- Jardueran arriskuei aurre egiteko erabiltzen den sistema.
- Ikuskapeneko eskuliburuak.
-Zuzendari teknikoaren eta ikuskatzaileen gaitasun agiriak.
-Entitateak, bertako bazkideek edo langileek produktu fitosanitarioak aplikatzeko ekipamenduen fabrikazio, merkaturatze edo konpontze jardueretan zuzeneko edo zeharkako parte-hartzerik ez dutela dioen adierazpena.
IV. ERANSKINA. 2016ko azaroaren 26aren aurreko ikuskapenen programazioko irizpideak
2011ko abenduaren 10a baino lehen eskuratutako ekipamenduen ikuskapenen programazioa modu uniformean banatuko da 2016ko azaroaren 26ra bitarte. Lehentasun hurrenkera handienetik txikieneranzkoa izanen da, ekipamenduak baremo honi jarraikiz lortutako puntuazioaren arabera.
|
ARRISKU IRIZPIDEA |
PUNTUAZIOA |
|
Ekipamenduen titulartasunari dagokionez: | |
|
Tratamendu fitosanitarioen zerbitzuen enpresak |
20 puntu |
|
Nekazaritzako kooperatibak, nekazarien beste elkarte batzuk eta hamar nekazari baino gehiago biltzen dituzten ondasun elkarteak |
10 puntu |
|
Ekipamenduen ezaugarriei dagokienez: | |
|
Beren indarrez ibiltzen diren ekipamenduak |
5 puntu |
|
Herrestan eramaten diren ekipamenduak, lan gaitasun handiagokoak |
5 puntu |
|
Ekipamenduaren antzinatasuna |
Puntu bat urteko (15 gehienez) |
Puntuetan berdinketa izanez gero, zaharrenari emanen zaio lehentasuna.
